दक्षिणपश्चिम फ्रान्समा हजारौँ मानिसलाई विस्थापित गराएको भीषण डढेलो धेरै दिनदेखि थप नफैलिएपछि अग्निनियन्त्रकहरू अहिले बाँकी रहेका आगोका सक्रिय विन्दु (हटस्पट) पूर्ण रूपमा नियन्त्रणमा लिन केन्द्रित भएका छन् । अधिकारीहरूले मौसममा आएको अनुकूल परिवर्तनले नियन्त्रण अभियानलाई सहज बनाएको बताएका छन् ।

बोर्डो नजिकैको गिरोन्द क्षेत्रको एटलान्टिक तटीय भागमा लागेको डढेलोले हालसम्म करिब ४२ हजार हेक्टर पाइन वन तथा पर्यटकीय क्षेत्र नष्ट गरिसकेको छ । आगोले जलेको क्षेत्रफल पेरिस सहरको क्षेत्रफलभन्दा करिब चार गुणा ठूलो रहेको जनाइएको छ । यद्यपि पछिल्ला केही दिनयता आगो नयाँ क्षेत्रमा फैलिएको छैन ।

सरकारी अधिकारीहरूका अनुसार रातिको तापक्रम घट्नु र आद्र्रता बढ्नुका कारण आगो नियन्त्रणमा खटिएका टोलीलाई राहत पुगेको छ । अहिले अग्निनियन्त्रकहरूले वन क्षेत्र र समुद्री तट नजिकका बालुवाका टाकुरामा बाँकी रहेका आगोका केन्द्रहरू पूर्ण रूपमा निभाउने काम गरिरहेका छन् ।

यस डढेलोका कारण सुरुआतमा करिब दुई लाख २४ हजार मानिस सुरक्षित स्थानमा जान बाध्य भएका थिए । अवस्था सुधार हुँदै गएपछि यसै साता करिब एक लाख ४४ हजार विस्थापितलाई आफ्ना घर फर्कन अनुमति दिइएको छ ।

फ्रान्सका गृहमन्त्री लरेन्ट नुनेजले शुक्रबार आरटीएल रेडियोसँग कुरा गर्दै आगोको अवस्था अहिले स्थिर भए पनि पूर्ण रूपमा नियन्त्रणमा नआइसकेको बताए । उनका अनुसार केही स्थानमा अझै आगोका सक्रिय विन्दु रहेकाले सतर्कता कायम राखिएको छ ।

यसैबीच, युक्रेनले फ्रान्सको डढेलो नियन्त्रण अभियानमा सहयोग गर्न आगामी दिनमा ७० जना नागरिक सुरक्षा कर्मचारी र १० वटा सवारीसाधन पठाउने भएको मन्त्री नुनेजले सामाजिक सञ्जालमार्फत जानकारी दिएको छन् ।

यस वर्ष युरोपले असाधारण गर्मीको सामना गरिरहेको छ । उच्च तापक्रम र सुक्खापनका कारण फ्रान्ससहित बेलायत, स्पेन, जर्मनी, ग्रीस र टर्कीमा पनि डढेलोका घटना तीव्र रूपमा बढिरहेका छन् ।रासस

प्रकाशित समय : १८:३२ बजे