अन्तर्राष्ट्रिय मानवअधिकार संस्था ह्युमन राइट्स वाच (एचआरडब्लु) ले गत जुन महिनामा मध्य मालीको एक गाउँमा रुसी सरकार समर्थित अफ्रिका कोप्र्सले गरेको हवाई आक्रमणमा तीन बालबालिकासहित आठ सर्वसाधारणको मृत्यु भएको जनाएको छ । संस्थाले आक्रमणमा कुनै पनि इस्लामिक विद्रोही लडाकू मारिएको प्रमाण फेला नपरेको दाबी गर्दै घटनाको निष्पक्ष अनुसन्धान गर्न माली सरकारलाई आग्रह गरेको छ ।

एचआरडब्लुका अनुसार जुन १५ मा मोप्टी क्षेत्रको किर्निया गाउँमा रुसी सुखोई सु–२४ आक्रमणकारी विमानबाट दुईवटा बम खसालिएको थियो । पहिलो आक्रमण गाउँ प्रमुखको घर नजिकै भएको थियो, जसमा उहाँकी श्रीमती र तीन सन्तानको मृत्यु भएको बताइएको छ । दोस्रो आक्रमण नजिकैको गाईवस्तु बजारमा हुँदा थप चार जनाको ज्यान गएको संस्थाले जनाएको छ ।

यद्यपि, एसोसिएटेड प्रेसले एचआरडब्लुको उक्त दाबी स्वतन्त्र रूपमा पुष्टि गर्न नसकेको जनाएको छ ।

एचआरडब्लुले घटनाबारे १९ जनासँग अन्तर्वार्ता लिएको, उपग्रह तस्बिरको विश्लेषण गरेको तथा अफ्रिका कोप्र्सले उक्त आक्रमणलाई ‘आतङ्ककारीहरूको जमघट’ लक्षित गरिएको भन्दै सार्वजनिक गरेको भिडियोसमेत अध्ययन गरेको जनाएको छ । अनुसन्धानकर्ताहरूका अनुसार घटनाको समयमा गाउँमा करिब १०० जना जमाअत नुसरत अल–इस्लाम वाल–मुस्लिमिन (जेएनआइएम) का लडाकू रहेको अनुमान गरिए पनि उनीहरू अधिकांश अन्य स्थानमा भेला भएका थिए र आक्रमण स्पष्ट सैन्य लक्ष्यमा केन्द्रित भएको देखिँदैन ।

अधिकार समूहले माली सरकारलाई घटनाको स्वतन्त्र अनुसन्धान गरी दोषीलाई कानूनी दायरामा ल्याउन आग्रह गरेको छ । अन्यथा यो घटना सम्भावित युद्ध अपराधका रूपमा व्याख्या हुन सक्ने संस्थाको चेतावनी छ ।

रुसको रक्षा मन्त्रालयले भने यस विषयमा गरिएको टिप्पणीको अनुरोधमा तत्काल कुनै प्रतिक्रिया दिएको छैन ।

माली एक दशकभन्दा बढी समयदेखि अल–कायदा र इस्लामिक स्टेटसँग आबद्ध सशस्त्र समूहहरू, विशेषगरी जेएनआइएम, तथा उत्तरका तुआरेग पृथकतावादी विद्रोहीहरूको हिंसाबाट प्रभावित छ । पछिल्ला महिनाहरूमा जेएनआइएम र तुआरेग विद्रोहीहरूको गठबन्धनले राजधानी बामाकोको विमानस्थल, नजिकैको काटी सैन्य छावनी तथा उत्तर र मध्य मालीका विभिन्न सहरमा समन्वित आक्रमण गरेपछि सुरक्षा अवस्था थप जटिल बनेको छ ।

सन् २०२१ को अन्त्यदेखि मालीको सैनिक नेतृत्वलाई विद्रोहीविरुद्धको अभियानमा सहयोग गर्न रुसी भाडाका सैनिकहरू त्यहाँ सक्रिय छन् । गत वर्ष निजी सैनिक समूह वाग्नरको स्थानमा रुसको रक्षा मन्त्रालयअन्तर्गतको अफ्रिका कोप्र्सले मालीमा आफ्नो भूमिका विस्तार गरेको थियो ।रासस

प्रकाशित समय : १८:३६ बजे