म्याड्रिडबाट १०० किलोमिटर उत्तरतर्फ फैलिएको भीषण डढेलोले १२ हजार हेक्टरभन्दा बढी क्षेत्र जलेर नष्ट गरेको छ र सयौँ मानिसहरूलाई सुरक्षित स्थानमा सार्नुपरेको स्थानीय अधिकारीहरूले आइतबार जानकारी दिएका छन् ।

गत बिहीबार ग्वाडालाजारा प्रान्तमा सुरु भएको यो आगो सिएरा नोर्टे प्राकृतिक निकुञ्जसमेत रहेको क्षेत्रमा फैलिएको हो । हालसम्म कुनै मानवीय क्षति भएको छैन, तर क्षेत्रीय अध्यक्ष एमिलियानो गार्सिया पेज र स्थानीय अधिकारीहरूले यसलाई नियन्त्रण गर्न ‘कठिन’ डढेलो बताएका छन् ।

डढेलो चील, ब्वाँसो र पुतलीजस्ता लोपोन्मुख प्रजातिका जनावरहरू बसोबास गर्ने जङ्गलले ढाकिएको पहाडी क्षेत्रमा सुरु भएको हो ।

यो घटना बुधबार जारागोजाको नजिक सुरु भएको अर्को भीषण डढेलोको लगत्तै भएको हो । त्यसले हालसम्म १६ हजार हेक्टरभन्दा बढी क्षेत्र विनास गरेको छ र अझै नियन्त्रणमा आएको छैन ।
यी डढेलोबाट कुनै मानवीय क्षति भएको रिपोर्ट भने आएको छैन ।

यो महिनाको सुरुतिर स्पेनले आफ्नो हालैको इतिहासमा सबैभन्दा घातक डढेलोको सामना गर्नुपरेको थियो । दक्षिणी अल्मेरिया प्रान्तमा भएको त्यस डढेलोमा१३ जनाको मृत्यु भएको थियो र सात हजार हेक्टर क्षेत्र नष्ट भएको थियो ।

स्पेनले पछिल्ला वर्षहरूमा स्पेनमा लामा समय र बारम्बार उष्णलहरको सामना गर्नुपरेको छ । स्पेनका कतिपय प्रभावित भागमा तापक्रम ४० डिग्री सेल्सियसभन्दा माथि पुग्ने गरेको छ । यस्तो अवस्थाले विनाशकारी आगलागी निम्त्याउने गरेको छ ।

वैज्ञानिकहरूका अनुसार मानवीय कारणले भएको जलवायु परिवर्तनले उष्ण लहरको अवधि, तीव्रता र बारम्बारता बढाएको छ, जसले वनस्पतिलाई सुकाएर आगलागीको जोखिम बढाउँछ ।

प्रकाशित समय : १८:२७ बजे