राँझा (बाँके) । बाँकेमा निर्माणाधीन सिक्टा सिँचाइ आयोजनाले नहरमा नियमित पानी छोड्न थालेपछि यहाँका किसान खुसी हुन थालेका छन् ।

राप्तीसोनारी गाउँपालिका–२ अगैयास्थित राप्ती नदीमा बाँध निर्माण गरी सञ्चालन गरिएको सिक्टा सिँचाइ आयोजनाले मर्मतसम्भारको समयबाहेक किसानको मागअनुसार बाह्रै महिना नहरमा नियमित पानी उपलब्ध गराउँदै आएको छ ।

सूचना अधिकारी तथा सिनियर डिभिजनल इन्जिनियर मनोजकुमार साहका अनुसार किसानको आवश्यकतालाई प्राथमिकतामा राख्दै मर्मतको समय बाहेक नहरमा निरन्तर पानी उपलब्ध गराइएको छ ।

उहाँका अनुसार यसले किसानलाई धान, गहुँ मात्र होइन, बेमौसमी तरकारी खेतीमार्फत समेत आर्थिक लाभ लिन सहयोग पुगेको छ ।

आयोजनाले ४२ हजार ७६६ हेक्टर जमिनमा सिँचाइ पुर्‍याउने लक्ष्य राखेकोमा हालसम्म करिब २४ हजार हेक्टर क्षेत्रमा प्रत्यक्ष सिँचाइ सुविधा पुगेको छ ।

सिँचाइ सुविधा पुगेका क्षेत्रका किसानले समयमै धानको बीउ राख्न थालेका छन् । राप्तीसोनारी, कोहलपुर र बैजनाथ क्षेत्रका किसानले वर्षा नहुँदा पनि नियमित सिँचाइका कारण बीउ राख्ने काम अघि बढाएका छन् ।

राप्तीसोनारी–७ का वडाध्यक्ष रामलखन थारुका अनुसार फत्तेपुर क्षेत्रका किसानले समयमै धानको बीउ राखिसकेका छन् ।

सिँचाइ सुविधा पुगेको क्षेत्र र वैकल्पिक उपाय प्रयोग भएका ठाउँमा हालसम्म करिब ४५ प्रतिशत किसानले मात्र धानको बीउ राखेको कृषि ज्ञान केन्द्र बाँकेकी सूचना अधिकारी सुजिता शर्माले जानकारी दिइन् । बाँकेमा कुल ३३ हजार ७८० हेक्टर क्षेत्रफलमा वर्षे धानखेती हुने गरेको छ ।

प्रकाशित समय : ०७:२५ बजे