काठमाडौं । लामो समयदेखि न्यायको ढोका ढकढकाउँदै सडक संघर्षमा होमिएका सुजन बिकको परिवारले अन्ततः सिंहदरबारभित्रै गृहमन्त्री सुधन गुरुङलाई भेटेर आफ्नो माग राखेका छन् । विगत तीन महिनादेखि आफ्नी दिवंगत श्रीमतीको न्यायका लागि काठमाडौँका सडकमा धर्ना दिँदै आएका चितवन रत्ननगर नगरपालिकाका सुजन बिकलाई गृहमन्त्री सुधन गुरुङले मन्त्रालयमै बोलाएर भेट्गरेका हुन् ।

आफ्नो काखमा नवजात शिशु (बच्चा) च्यापेर न्यायको याचना गर्दै सुजन बिक गृहमन्त्रीको कार्यकक्षमा पुगेका थिए । सो क्रममा उनले श्रीमतीको अकाल मृत्यु अस्पतालको गम्भीर लापरबाहीका कारण भएको भन्दै आँसु बगाए । सुत्केरी अवस्थामा अस्पतालले उचित हेरचाह र उपचार नगर्दा गृहिणी गुमाउनुपरेको र नवजात शिशुको भविष्य संकटमा परेको भन्दै उनले सरकारसँग गुहार मागेका थिए ।

पीडित सुजन बिक र उनको बच्चाको कारुणिक अवस्था देखेपछि गृहमन्त्री सुधन गुरुङ निकै भावुक बन्नुभएको थियो। परिवारको सम्पूर्ण पीडा र गुनासो ध्यानपूर्वक सुनिसकेपछि गृहमन्त्री गुरुङले तत्कालै एक्सन लिएका छन् ।

‘राज्य नागरिकको अभिभावक हो। अस्पतालको लापरबाहीका कारण कसैले ज्यान गुमाउनुपर्ने अवस्था आउनु अत्यन्तै दुःखद छ । यो घटनाको गहिराइमा पुगेर छानबिन गरिनेछ र दोषीलाई कडा भन्दा कडा कारबाही हुनेछ,’ गुरुङले भने ।

गृहमन्त्री गुरुङले मन्त्रालयका अधिकारीहरूलाई तत्कालै एक छानबिन समिति गठन गर्न र उक्त घटनाको सत्य तथ्य विवरण यथाशीघ्र बाहिर ल्याउन कडा निर्देशन दिए । छानबिनको प्रतिवेदनका आधारमा दोषी देखिएका जोकोहीलाई पनि कानुनी दायरामा ल्याइने प्रतिबद्धता उनले व्यक्त गरे ।

प्रकाशित समय : १०:११ बजे