हिमालयन बैंक लिमिटेडले चालु आर्थिक वर्ष २०८२/०८३ को दोस्रो त्रैमाससम्म १ अर्ब २९ करोड २६ लाख रुपैयाँ नाफा कमाएको छ । बिहीबार प्रकाशित अपरिष्कृत वित्तीय विवरणअनुसार बैंकको नाफा, ब्याज आम्दानी र सञ्चालन मुनाफा लगायतका प्रमुख सूचकहरूमा ह्रास आएको देखिएको छ।

चालु आर्थिक वर्षको पुस मसान्तसम्ममा बैंकको खुद नाफा करिब १५ प्रतिशतले खुम्चिएको छ। गत आर्थिक वर्षको सोही अवधिमा १ अर्ब ५१ करोड ८७ लाख रुपैयाँ नाफा कमाएको थियो ।

बैंकको मुख्य आम्दानी मानिने खुद ब्याज आम्दानीमा समेत १०.१८ प्रतिशतको गिरावट आएको छ। गत वर्ष ५ अर्ब २३ करोड ५६ लाख रुपैयाँ रहेको यस्तो आम्दानी यस वर्ष ४ अर्ब ७० करोड २३ लाख रुपैयाँमा सीमित हुन पुगेको हो।

त्यस्तै, बैंकको सञ्चालन मुनाफामा पनि भारी गिरावट देखिएको छ। गत वर्ष ३ अर्ब १२ करोड ३३ लाख रुपैयाँ रहेको सञ्चालन नाफा घटेर १ अर्ब ८५ करोड ३७ लाख रुपैयाँमा झरेको छ।

प्रकाशित समय : १०:४९ बजे