अस्ट्रेलियासँगको एशेज टेस्ट क्रिकेट शृङ्खलाको चौथो खेलको पहिलो पारीमा इङ्ग्ल्यान्ड १ सय १० रनमै अलआउट भएको छ ।

खेलको पहिलो दिनको चिया समयपछि ब्याटिङ शुरू गरेको इङ्ग्ल्यान्डले २९ ओभर ५ बलमा १ सय १० रन बनाउँदा सबै विकेट गुमायो । इङ्ग्ल्यान्डका ह्यारी ब्रूकले सबैभन्दा धेरै ४१ रन बनाए । अस्ट्रेलियाका माइकल नेसरले ४ विकेट लिए ।

यसअघि आजै घरेलु मैदान मेलबर्नमा टस हारेर ब्याटिङ गरेको अस्ट्रेलियाले पहिलो पारीमा १ सय ५२ रन बनायो । अस्ट्रेलियाका माइकल नेसरले सबैभन्दा धेरै ३५ रन बनाए । इङ्ग्ल्यान्डका जोश टङ्गले ५ विकेट लिए ।

यस्तै आजै दोस्रो पारीको ब्याटिङ शुरू गरेको अस्ट्रेलियाले पहिलो दिनको खेल सकिँदा एक विकेट पनि नगुमाइ ४ रन बनाएको छ । योसँगै अस्ट्रेलियाले ४६ रनको अग्रता लिएको छ ।

एशेज टेस्ट शृङ्खला अस्ट्रेलियाले यसअघि नै जितिसकेको छ । अस्ट्रेलियाले पहिलो टेस्ट ८ विकेट, दोस्रो टेस्ट ८ विकेट र तेस्रो टेस्ट ८२ रनले जितेको थियो ।

प्रकाशित समय : १५:५८ बजे