निष्क्रिय कर्जामा वृद्धि हुँदा वाणिज्य बैंक मात्रै नभएर विकास बैंक पनि दबाबमा देखिएका छन् । चालू आर्थिक वर्षको तेस्रो त्रैमास अर्थात गत साउनदेखि चैत्र मसान्तसम्म पनि राष्ट्रिय स्तरका विकास बैंकहरु निष्क्रिय कर्जा नियन्त्रणमा चुकेका छन् ।

तेस्रो त्रैमासमा यी बैंकहरूको औसत निष्क्रिय कर्जा ५.०४ प्रतिशत पुगेको छ । गत आर्थिक वर्षको सोही अवधिमा राष्ट्रिय स्तरका विकास बैंकहरूको औसत निष्क्रिय कर्जा ३.५८ प्रतिशत थियो ।लुम्बिनी विकास बैंकको निष्क्रिय कर्जा सबैभन्दा धेरै ७.१८ प्रतिशत पुगेको छ ।

गत आर्थिक वर्षको सोही अवधिमा यस बैंकको निष्क्रिय कर्जा ३.६९ प्रतिशत थियो । त्यसैगरी,महालक्ष्मी विकास बैंकको निष्क्रिय कर्जा ४.१६ प्रतिशतबाट बढेर ४.९९ प्रतिशत, ज्योति विकास बैंकको ४.९७ प्रतिशतबाट बढेर ४.९८ प्रतिशत, सांग्रिला डेभलपमेन्ट बैंकको ३.८४ प्रतिशतबाट बढेर ४.९७ प्रतिशत पुगेको छ ।

त्यस्तै, गरिमा विकास बैंकको गत आर्थिक वर्षको तेस्रो त्रैमासमा २.९७ प्रतिशत रहेको निष्क्रिय कर्जा चालू आर्थिक वर्षको सोही अवधिमा बढेर ४.७८ प्रतिशत पुगेको छ । साइन रेसुंगा बैंकको निष्क्रिय कर्जा गत आर्थिक वर्षको तुलनामा चालू आर्थिक वर्षमा बढेको छ ।

गत आर्थिक वर्षको तेस्रो त्रैमासमा ३.४१ प्रतिशत रहेको यस बैंकको निष्क्रिय कर्जा चालू आर्थिक वर्षको सोही अवधिमा ४.७६ प्रतिशत पुगेको छ । त्यस्तै, मुक्तिनाथ विकास बैंकको निष्क्रिय कर्जा २.०२ प्रतिशतबाट बढेर चालू आर्थिक वर्षमा ४.४१ प्रतिशत पुग्दा कामना सेवा विकास बैंकको ३.५५ प्रतिशतबाट बढेर ४.२७ प्रतिशत पुगेको छ । निष्क्रिय कर्जा नियन्त्रणमा विकास बैंकहरु चुकेपनि नाफामा भने सुधार गरेका छन् ।

चालू आर्थिक वर्ष २०८१–८२ को तेस्रो त्रैमासिक वित्तीय विवरणले यस्तो देखाएको हो । विकास बैंकहरूले सार्वजनिक गरेको तेस्रो त्रैमाससम्मको वित्तीय विवरणअनुसार ३ अर्ब ६९ करोड २७ लाख रुपैयाँ बराबरको नाफा आर्जन गरेका हुन् । गत आर्थिक वर्षको सोही अवधिमा विकास बैंकहरूले ३ अर्ब ५३ करोड ८८ लाख रुपैयाँ नाफा कमाएका थिए ।

प्रकाशित समय : १५:१५ बजे