राष्ट्रिय लोक तथा दोहारीगीत प्रतिष्ठान नेपाल, गण्डकी प्रदेश समितिले लोकगायन प्रतियोगिता ‘प्रथम गण्डकी लोकतारा’ हुने भएको छ । प्रतिभा पहिचानसँगै लोकसङ्गीत जगेर्ना गर्ने उद्देश्यले प्रतियोगिता आयोजना गरिएको प्रतिष्ठानको गण्डकी प्रदेश कार्यसमितिका अध्यक्ष राजन कार्कीले जानकारी दिए ।

उनका अनुसार मुस्ताङ र मनाङबाहेक प्रदेशका नौ जिल्लामा रहेका प्रतिष्ठानका जिल्ला समितिले आगामी जेठ २० गतेसम्म ‘अडिसन’ सञ्चालन गरी छनोटमा परेका प्रतिभाको नाम प्रदेश समितिमा पठाउने छन् ।

“प्रतियोगिताको फाइनल प्रतिस्पर्धा विश्वसङ्गीत दिवसको अवसर पारेर आगामी असार ७ गते पोखरामा आयोजना हुनेछ”, उनले भने, “निर्णायकमा लोकसङ्गीत क्षेत्रका विशिष्ट व्यक्तित्वहरु रहनुहुनेछ ।”

प्रतिष्ठानको प्रदेश कार्यसमितिले पहिलोपटक प्रदेशस्तरीय बृहत् लोकगायन प्रतियोगिता सञ्चालन गर्न लागेको हो । प्रतियोगितामा प्रथम पुरस्कार ‘गण्डकी लोकतारा’ उपाधिसहित ५१ हजार १११, द्वितीयलाई ३१ हजार १११, तृतीयलाई २१ हजार १११ र सान्त्वना पुरस्कार ११ हजार १११ राखिएको छ ।

प्रकाशित समय : २१:१८ बजे