नेपालमा खगोलशास्त्र शिक्षालाई प्रवर्द्धन गर्न विद्यालय शिक्षामा प्रयोगात्मक सिकाइ विधि समावेश गर्न शिक्षक र विद्यार्थीलाई तालिम दिइएको छ ।

नेपाल एष्ट्रोनोमिकल सोसाइटी (नासो) ले आयोजना गरेको गतिशील मानव सौर्यमण्डल शिक्षक तालिम काठमाडौँको नासा कलेज, तिनकुनेमा सम्पन्न भएको हो । नेपाल तथा फ्रान्सस्थित शिक्षाका लागि खगोल कार्यालयको सहकार्यमा सो कार्यक्रम सम्पन्न हुन लागेको हो ।

तालिममा बागमती, मधेश र कोशी प्रदेशका १४ विद्यालय तथा संस्थाका २१ शिक्षक तथा शिक्षिका सहभागी थिए । दुई–दिनसम्म चलेको कार्यक्रममा ग्रहहरूको कक्षीय गतिको अध्ययन, अन्तरक्रियात्मक गतिविधि तथा गतिशील मानव सौर्यमण्डल प्रयोग गरेर ग्रहहरूको गति बुझ्ने कार्यशाला समावेश गरिएको थियो ।

तालिम तीन जना स्रोतव्यक्तिद्वारा सञ्चालन गरिएको थियो । शिक्षाका लागि खगोल कार्यालय, फ्रान्सका प्रबन्धक इमानुएल रोलिन्डे, शिक्षाका लागि खगोल कार्यालय, नेपालका प्रबन्धक सुरेश भट्टराई र शिक्षाका लागि खगोल कार्यालय, नेपालका उप–प्रबन्धक मनिषा द्वाले तालिम दिएका थिए।

कूल २१ सहभागीमध्ये सात पुरुष र १४ महिला सहभागी भएको जनाइएको छ । जसले शिक्षामा महिलाको सशक्त उपस्थिति दर्शाउँछ । कार्यक्रममा विद्यालय शिक्षामा खगोलशास्त्रलाई कसरी समावेश गर्ने, ग्रहको गतिशीलता बुझाउन व्यावहारिक कार्यशाला, तथा शिक्षकलाई गतिशील मानव सौर्यमण्डल निर्माण र प्रयोग गर्ने सीप प्रदान गरिएको जनाइएको छ ।

तालिमले शिक्षकलाई नवीनतम् शिक्षण प्रविधि अपनाउन प्रेरित गर्ने र विद्यार्थीमा खगोल शास्त्र तथा अन्तरिक्ष विज्ञानप्रति रुचि बढाउने अपेक्षा गरिएको छ ।

प्रकाशित समय : २१:३७ बजे