नेपालमा रोजगारीको अवसर नभए पछि कामको खोजिमा नेपालबाट वर्षेनी रुपमा लाखौँ युवाहरु विदेश गइरहेका छन् । नेपालमा रोजगारी पाउन नसके पछि युवाहरु विदेशीने क्रम दिनप्रतिदिन बढी रहेको छ ।

वैदेशिक रोजगार विभागको तथ्यांक अनुसार नेपालबाट विदेश जाने युवाहरुको संख्या कोशी प्रदेश र मधेश प्रदेशबाट सबै भन्दा धेरै रहेको छ । विभागले सार्वजनिक गरेको कात्तिक महिनाको तथ्यांक अनुसार कोशी प्रदेशबाट सबैभन्दा धेरै युवा युवतीहरु रोजगारीका लागि विदेश गएका छन् । वार्षिक तथ्यांक हेर्दा भने मधेश प्रदेशबाट धेरै युवा रोजगारीका खोजीमा विदेश गएको देखिन्छ ।

कात्तिक महिनामा नेपालबाट रोजगारीका गएका ४३ हजार ६२२ जना नेपाली मध्ये कोशी प्रदेशबाट सबैभन्दा बढी ९ हजार ४२० जना रोजगारीका लागि विदेशीयका छन् । एक महिनाको अवधिमा कर्णाली प्रदेशबाट सबैभन्दा कम युवा युवतीहरु रोजगारीका लागि विदेश गएको तथ्यांकले देखाएको छ । कात्तिक महिनामा कार्णाली प्रदेशबाट १ हजार २२९ जनाले श्रम स्वीकृति लिएर विदेश गएका छन् ।

कात्तिक महिनामा रोजगारीका लागि विदेश जानेको संख्याका आधारमा दोस्रो स्थानमा मधेश प्रदेश रहेको छ । जहाँबाट एक महिनाको अवधिमा ८ हजार ७६६ जना रोजगारीका लागि विदेशीयका छन् । त्यस्तै यो अवधिमा बागमती प्रदेशबा ७ हजार ९५४ जना, लुम्बिनीबाट ७ हजार ७६६ जना, गण्डकीबाट ६ हजार ७८८ जना र सुदुरपश्चिमबाट १ हजार ६९३ जना रोजगारीका लागि विदेश गएका छन् ।

बार्षिक रुपमा मधेश अगाडि

कात्तिक महिनाको तथ्यांक अनुसार रोजगारीका लागि विदेश जानेको संख्या कोशीमा धेरै भए पनि वार्षिक रुपमा भने मधेश प्रदेशबाट सबैभन्दा धेरै युवा युवती विदेशीएका छन् । गत आर्थिक वर्षको तथ्यांक अनुसार मधेश प्रदेशबाट १ लाख ८१ हजार ६१३ जना श्रम स्वीृकति लिएर विदेश गएका छन् । वार्षिक रुपमा कर्णाली प्रदेशबाट नै सबैभन्दा कम नेपाली वैदेशिक रोजगारीमा गएको तथ्यांकले देखाएको छ । एक वर्षको अवधिमा कर्णाली प्रदेशबाट जम्मा २० हजार ३४३ जना रोजगारीका लागि विदेश गएका छन् ।

गत आर्थिक वर्षमा कोशी प्रदेशबाट १ लाख ६८ हजार २७८ जना रोजगारीका लागि विदेशीयका छन् । त्यस्तै बागमती प्रदेशबाट १ लाख १६ हजार ८९४ जना, लुम्बिनी प्रदेशबाट १ लाख ३४ हजार ४८३, गण्डकी प्रदेशबाट ९९ हजार ८०३ जना र सुदुरपश्चिम प्रदेशबाट ९६ हजार ७९५ जना रोजगारीका लागि विदेश गएका छन् ।

कर्णाली र सुदुरपश्चिम प्रदेशबाट रोजगारीका लागि धेरै युवाहरु भारतमा जाने गरेका छन् । तर विभागको तथ्यांकमा त्यो समेटिएको छैन । जसले गर्दा त्यहाँको संख्या कम देखिएको जानकारहरुको भनाइ छ । भारत जानेको संख्यालाई पनि यसमा गणना गर्ने हो भने कर्णाली र सुदुरपश्चिम प्रदेशबाट विदेश जानेको संख्या निकै धेरै हुने बताइन्छ ।

प्रकाशित समय : १३:४४ बजे