स्वास्थ्य तथा जनसङ्ख्यामन्त्री मोहनबहादुर बस्नेतले कान्ति बाल अस्पतालमा बालिका मृत्यु प्रकरणमा दोषीमाथि कारबाही हुने प्रतिबद्धता जनाएका छन् ।

इजिप्टमा आयोजित कार्यक्रममा सहभागी भएर आज नेपाल फर्किएका मन्त्री बस्नेतले त्रिभुवन अन्तर्राष्ट्रिय विमानस्थलमा सञ्चारकर्मीहरूसँगको कुरा गर्दै सो कुरा बताएका हुन । गत सोमबार मकवानपुर थाहा नगरपालिका १० घर भई हाल काठमाडौँको बाफल बस्ने पाँच वर्षीय रेजिशा गोपालीको समयमा उपचार नपाउँदा अस्पतालमा मृत्यु भएको आफन्तले बताएका छन् ।

मन्त्री बस्नेतले भने,‘यस घटनाबारे म बाहिर हुँदा पनि चासोका साथ हेरेको छु । समयमा उपचार नपाएर बालिकाको मृत्युमा भएको भन्ने छ । मैले इजिप्टबाट नै सचिवज्यूलाई फोन गरेर छानबिन समिति बनाउन निर्देशन दिएको थिएँ । जानाजान केही गल्ती भएको छ भने कारबाही हुन्छ । मैले कारबाही नै गर्नुपर्छ भनेको छु ।’

बालिका मृत्यु प्रकरणको छानबिन गर्न कान्ति बाल अस्पतालले समिति गठन गरिसकेको छ । सो घटनाको सत्यतथ्य छानबिन गरी पाँच दिनभित्र प्रतिवेदन बुझाउन समितिलाई निर्देशन दिएको छ । अस्पतालले डा।प्रकाश जोशीको संयोजकत्वमा तीन सदस्यीय छानबिन समिति गठन गरेको छ । सदस्यमा नर्सिङ अधिकृत अजिता सिलवाल र शाखा अधिकृत डम्बरु दाहाल रहेका छन् ।

५ देखि ८ तारिखसम्म इजिप्टको राजधानी कायरोमा सम्पन्न जनसङ्ख्या स्वास्थ्य तथा विकास सम्मेलनमा भाग लिएर मन्त्री बस्ने स्वदेश फर्किएका हुन । कार्यक्रममा धेरैका देशका स्वास्थ्यमन्त्री र विभिन्न दातृ निकायका प्रतिनिधिहरूको सहभागी रहेको थियो । बस्नेतका अनुसार कार्यक्रममा जनसङ्ख्या विशेष गरेर बसाइसराइ र अव्यवस्थित बसोबासले स्वास्थ्य क्षेत्रमा परेका समस्याहरूको बारेमा छलफल भएको थियो । त्यस्तै आधारभूत स्वास्थ्य सेवा दिने कुरालाई कसरी व्यवस्थित गर्न सकिन्छ भनेर रणनीतिक विषयहरूमा पनि छलफल भएको थियो ।