संस्कृति, पर्यटन तथा नागरिक उड्डयनमन्त्री सुदन किराँतीले मन्त्रालयको वार्षिक विकास कार्यक्रमको पुस्तकमा प्रदेशको नाम हटाइदिएका छन् । प्रदेशसभाबाट दुई तिहाइले पारित नाममा असन्तुष्टि जनाउँदै उनले पुस्तकबाट बहिष्कार गरेका हुन् ।

आइतबारको संसद् बैठकमा मन्त्री किराँतीले प्रदेशहरूको नाम नलेखी नम्बर मात्रै लेखेर संसद्मा प्रस्तुत भएपछि विरोध भएको थियो । प्रमुख प्रतिपक्ष दल एमालेले विरोध गरेपछि आइतबारको कार्यसूचीबाट पर्यटन मन्त्रालयमाथिको छलफल हटाइएको थियो ।

सभामुख देवराज घिमिरेले पर्यटनमन्त्री किराँतीलाई स्पष्ट पार्न समय दिए । किराँतीले नाम सच्याएपछि पुनः वितरण गरिने प्रतिबद्धता जनाएका थिए । नाम सच्याउनुको सट्टा उनी मंगलबारको बैठकमा नम्बरसमेत नराखी प्रस्तुत भए ।

संविधानले संघीय संसद्लाई जति स्वायत्त बनाएको छ, त्यति नै प्रदेशसभालाई अधिकार दिएको छ । तर, प्रदेशसभाबाट पारित नाममा संघीय मन्त्री किरातीले असन्तुष्टि जनाउँदै बजेट पुस्तिकाबाट हटाइदिएका हुन् ।

अहिले कोशी प्रदेशमा नामाकरणको विषयलाई लिएर आन्दोलन चर्किरहेको छ । पहिचानवादीहरुले किराँत–लिम्बुवान् घोषणा गर्नुपर्ने माग गरेका छन् । तर कोशी प्रदेशको नाम एमाले, काँग्रेस र माओवादीसहितका दलले दुईतिहाईले पारित गरेका हुन् ।

प्रकाशित समय : ०७:४८ बजे