अमेरिकी सरकारले नेपालबाट अवैध रुपमा लगिएका काष्ठकलाका कलात्मक ४० वटा सम्पदा घर फर्काइदिने भएको छ । वासिङ्‍टन डीसीस्थित नेपाली दूतावासमा शुक्रबार आयोजित एक समारोहमाझ अमेरिकी सरकारको गृह मामिला निकायका अधिकारीले यी सम्पदा दूतावासलाई हस्तान्तरण गरेको दूतावासले विज्ञप्तिमार्फत सार्वजनिक गरेको छ ।

अमेरिकाको हवाइ राज्यको होनोलुलुमा सन् २०१० अगस्ट १० मा त्यहाँको भन्सारले पक्राउ गरेको सम्पदाबारेको सूचना बाहिर आएपछि यसको ‘उत्पत्तिको मुलुक’ (कन्ट्री अफ ओरिजिन) र प्रामाणिकता स्पष्ट भएपछि अमेरिकी सरकारले सम्पदा फिर्ता गरेको हो । सम्पदाको अधिकार तथा घरफिर्तीका लागि नेपालले सन् २०११ मै अमेरिकालाई औपचारिक पत्र पठाएपछि यो प्रक्रिया अघि बढेको हो ।

कलात्मक काष्ठकलामा हिन्दु, बौद्ध धर्मका प्रतिकात्मक बिम्ब तथा उन्नाइसौंदेखि बीसौं शताब्दीबीचको कलाशिल्पी कुँदिएको देख्न सकिन्छ । यीमध्ये केही सम्पदाको दूतावासमा सार्वजनिक प्रदर्शनी समेत गरिएको थियो । सम्पदामा भगवान् बुद्धको जीवन र सिकाइका चरणहरु झल्कने कलात्मक बिम्बसमेत समेटिएको छ ।

प्रकाशित समय : ०९:२६ बजे