नेपाल इन्भेष्टमेन्ट मेगा बैंक लिमिटेडको पूर्ण स्वामित्वको एनआइबीएल एस क्यापिटल योजना व्यवस्थापक तथा डिपोजिटरी रहेको एनआइबीएल म्युचुअल फण्डअन्तर्गतको ‘एनआइबीएल ग्रोथ फण्ड’ योजना इकाइ बाँडफाँट भएको छ ।

प्रतिइकाइ १० रुपैयाँ अंकित दरको १६ करोड इकाइहरु बाँडफाँट भएको हो । यसका लागि पुस ७ गतेदेखि पुस २१ गतेसम्म सार्वजनिक रुपमा बिक्री आह्वान गरिएको थियो । उक्त योजनाको इकाइ बाँडफाँट गत मंगलबार सम्पन्न भएको हो ।

१६ करोड इकाइहरुमध्ये बीजपुँजीबापत १ प्रतिशत अर्थात् १६ लाख इकाइ योजना व्यवस्थापक एनआइबीइएल एस क्यापिटल लिमिटेड तथा १९ प्रतिशत अर्थात् ३ करोड ४ लाख इकाइ कोष प्रवर्द्धक नेपाल इन्भेष्टमेन्ट मेगा बैंक लिमिटेड (साबिकको नेपाल इन्भेष्टमेन्ट बैंक लिमिटेड)को लागि गरी कुल निष्काशन गरिने इकाइमध्ये ३ करोड २० लाख इकाइ सुरक्षित राखी बाँकी रहेको १२ करोड ८० लाख इकाइको बिक्री खुल्ला गरिएको थियो ।

सो अवधिभित्र ४२ हजार ६० आवेदकहरुमार्फत ९ करोड ९३ लाख ६७ हजार ९ सय इकाइका लागि मात्र रीतपूर्वक आवेदन भई योजनाको आकार जम्मा १ अर्ब ३१ करोड ३६ लाख ७९ हजार हुने भएको छ । योजना व्यवस्थापक एनआइबीएल एस क्यापिटल लिमिटेडले बीजपुँजीको रुपमा ६३ लाख २१ हजार थप गरी रीतपूर्वक आवेदन दिने सबैलाई माग गरेअनुसार धितोपत्र निष्काशन तथा बाँडफाँट निर्देशिका २०७४ बमोजिम ३ गते बाँडफाँट गरिएको हो ।

६३ लाख २१ हजार रुपैयाँ थप गरी योजनाको आकार १ अर्ब ३२ करोड रुपैयाँ कायम गरिएको क्यापिटलले जनाएको छ ।