खाद्य व्यवस्था तथा व्यापार कम्पनीले खानेतेलको मूल्यमा थप १० रुपैयाँ घटाएको छ । छुट पसलमा बजारभाउ भन्दा बढी मूल्य राखेको गुनासो आएपछि कम्पनीले मंगलबार लिटरमा थप १० रुपैयाँ घटाएको कम्पनीका बिक्री बितरण विभाग प्रमुख भीमबहादुर थापाले जनाए । नयाँ मूल्य मंगलबारदेखि नै लागू भइसकेको छ ।

‘अब सर्वसाधारणले सनफ्लावर तेल मूल्य प्रतिलिटर २ सय ८५, तोरीको तेल २ सय ७५ र भटमासको तेल २ सय ४० रुपैयाँमा किन्न सक्छन्,’ थापाले भने, ‘उक्त मूल्य बजारभाउभन्दा धेरै सस्तो हो ।’ खाद्यले सीजी कम्पनीको तेल बिक्री गर्दै आएको छ ।

उक्त तेल साल्ट ट्रेडिङ कर्पोरेसनबाट खरिद गरेर बिक्री गरिएको थापाले बताए । ब्राण्डअनुसार पनि बजारमूल्य फरक भएको उनको दाबी छ । यद्यपि पछिल्लो समय सरकारले भन्सार दर घटाएपछि तेलको मूल्यमा गिरावट आएको छ ।

सहुलियत पसल सञ्चालन गर्नुअघि खाद्यले सनफ्लावर ३ सय २ रुपैयाँ, तोरी २ सय ८७ रुपैयाँ र भटमासको तेल २ सय ५२ रुपैयाँमा बिक्री गरेको थियो । असोज १ देखि सहुलियत पसल सञ्चालन भएलगत्तै प्रतिलिटर ७ रुपैयाँ घटाएर नयाँ मूल्य निर्धारण गरेको थियो । यसअनुसार सनफ्लावर प्रतिलिटर २ सय ९५, तोरीमा २ सय ८० र भटमास २ सय ४५ रुपैयाँमा बिक्री भएको थियो । मंगलबार मूल्य पुनः घटाइएको हो ।

मुसुरोको दालको मूल्य घटाएर १ सय ४५ रुपैयाँ तोकेको थापाले बताए । चाडबाडमा खाद्यसँगै साल्ट ट्रेडिङ कर्पोरेसन, दुग्ध विकास संस्थानले पनि आफ्नो उत्पादनमा छुट दिएका छन् । सहुलियत पसल असोज १ देखि कात्तिक १५ सम्म सञ्चालन हुनेछ ।