जाजरकोटमा स्वास्थ्य क्षेत्रको सेवा प्रवाहका हिसाबले बारेकोट गाउँपालिका फेरि पहिलो भएको छ । भाद्र २३ देखि  २४ सम्ममा संचालित आर्थिक वर्ष २०७८/०७९ को जिल्ला स्तरीय वार्षिक स्वास्थ्य समीक्षा गोष्ठीबाट सेवा प्रवाहका हिसाबले बारेकोट पहिलो भएको हो ।

समीक्षा गोष्ठीमा विभिन्न ४३ वटा सूचकहरुको मूल्यांकनबाट ६६.७१ अंक ल्याएर बारेकोट प्रथम भएको हो । यस्तै नलगाड नगरपालिका दोस्रो भएको छ । नलगाडले ६३.०९ अंक प्राप्त गरेको हो । ५९.५३ अकंसहित कुशे गाउँपालिका तेस्रो भएको छ ।

विगत तीन वर्षदेखि सेवा प्रवाहका हिसाबले बारेकोट गाउँपालिका प्रथम हुँदै आएको छ । यो वर्ष पनि पहिलो भएको हो ।

यो साखलाई बचाउन बारेकोटका स्वास्थ्यकर्मी निरन्तर लागिरहने बारेकोट स्वास्थ्य शाखा सह–संयोजक डम्बर बिक्रम कार्कीले बताए । उनले भने – ‘हामीसँग कुनै बेला स्रोत साधनको अभाव थियो । औषधि अभाव हुन्थ्यो । बारेकोटमा सिटामोल समेत पाउन कठिन हुने गरेको थियो । तर, अहिले लामो प्रयास र गाउँपालिकाको साथ सहयोगले बारेकोटसँग औषधिको अभाव छैन । सेवा प्रवाहमा गुनासोहरु आएका छैनन । आएका गुनासोहरुलाई सकेसम्म सम्बोधन गरिरहेका छौं । हामीले भरपुर रुपमा सेवा प्रवाह गरिरहेका छौं । यसैमा हामी स्वास्थ्यकर्मी अन्तुष्ट छौं । यसलाई बचाइराख्न हामी लागिरहने छौँ ।’

बारेकोटको स्वास्थ्य क्षेत्रलाई अझै प्रभावकारी बनाउन सबैको सहयोग रहनुपर्ने कार्कीको भनाइ छ – ‘हामी अहिले प्रथम आउनुमा गाउँपालिकाको सहयोग उत्तिकै रह्यो । सहकर्मीहरु त्यसरी नै खटिनु भएको छ । अझै यसलाई प्रभावकारी बनाउन गाउँपालिका र सरोकारवाला निकायहरुको हाम्रो शाखालाई साथ सहयोग चाहिन्छ । अहिलेसम्म भएको छ । अझै चाहिन्छ ।’

स्वास्थ्य कार्यक्रमहरुका विभिन्न सूचाङ्कहरुले बारेकोट पहिलो भएको स्वास्थ्य सेवा कार्यालय जाजरकोटका तथ्यांक सहायक टेकबहादुर घर्तीले जानकारी दिए । गएको शुक्रबार जिल्ला सदरमुकाममा एक कार्यक्रम गरेर प्रमाण–पत्रहरुको वितरण गरिएको थियो ।

शुक्रबार सम्पन्न गोष्ठी कार्यक्रममा स्वास्थ्य सेवा कार्यालयका निमित्त स्वास्थ्य सेवा व्यवस्थापक नवराज कँडेल, जिल्ला समन्वय समितिका प्रमुख कालीबहादुर खत्री लगायत नगरप्रमुख, उपप्रमुख, गाउँपालिका अध्यक्ष, उपाध्यक्ष, प्रमुख प्रशासकीय अधिकृत र स्वास्थ्य शाखा प्रमुखहरुको उपस्थिती थियो ।