प्रहरी महानिरीक्षक (आइजीपी) शैलेश थापा क्षेत्रीले प्रहरी अतिरिक्त महानिरीक्षक (एआइजी)द्वय निरज बहादुर शाही र प्रद्युम्न कुमार कार्कीलाई दर्ज्यानी चिह्न प्रदान गरेका छन् । यसका साथै प्राविधिक प्रहरी उपरीक्षक (एसपी)हरुमा पशुपति कुमार राय र श्याम कुमार मण्डललाई पनि आइजीपी थापाले दर्ज्यानी चिह्न प्रदान गरे । नेपाल सरकार मन्त्रिपरिषदको २०७७ साउन १२ गतेको निर्णयअनुसार उनीहरुको बढुवा भएको थियो ।

उक्त अवसरमा आइजीपी थापाले पदोन्नति भएका अधिकृतहरुलाई बधाई तथा शुभकामना दिँदै पदोन्नतिपश्चात प्रहरी अधिकृतहरुबाट आ-आफ्नो दक्षताअनुरुप थप उर्जासहित व्यावसायिक सेवाको अपेक्षा संगठनले लिएको बताए । व्यक्तिगत स्वार्थभन्दा माथि उठेर संगठनको बृहत्तर हितका लागि सबै प्रहरी कर्मचारीहरु अग्रसर हुनुपर्नेमा उनले जोड दिए ।

आइजीपी थापाले सामूहिक नेतृत्व सदैव संगठनको हितमा लाभकारी हुने चर्चा गर्दै एआइजीमा पदोन्नतिपश्चात नेतृत्व तह थप बलियो भएको उल्लेख गरे । आगामी दिनमा संगठनको हितको लागिसमेत नेतृत्व तह अत्यन्तै प्रभावकारी हुने विश्वास उनले व्यक्त गरे ।

उक्त अवसरमा पदोन्नति भएका अधिकृतहरूको तर्फबाट मन्तव्य व्यक्त गर्दै एआइजी शाहीले आफूहरु पदोन्नतिपश्चात प्राप्त जिम्मेवारीप्रति उत्तिकै गम्भीर र इमानदार रहेको बताए । संगठनको नीति निर्देशन र आदेशप्रति सदैव कर्तव्यनिष्ठ रही संगठनको बृहत्तर हित र गरिमालाई थप उचाईमा लैजान मन, वचन र कर्मले कटिबद्ध रही काम गर्ने प्रतिबद्धता उनले व्यक्त गरे ।

प्रकाशित समय : ००:५१ बजे