मंगलबार काठमाडौँको कमलादीमा ‘सुन’ फ्याँकेर भाग्न प्रयाेग भएकाे गाडी काठमाडौं उपत्यकाभित्रै भेटिएको छ । काठमाडौँ प्रहरी परिसरको टोलीले बिहीबार उक्त बा. ६ च ५५१९ नम्बरको स्कोर्पियो गाडी ललितपुरको नखिपोटमा फेला पारेकाे हो । प्रहरीका अनुसार निर्माणाधीन घरभित्र छोपेर राखिएको अवस्थामा उक्त गाडी फेला परेको हो ।

चेकजाँचको क्रममा नरोकिएपछि पछ्याउँदा सो स्कार्पियो गाडीमा सवार व्यक्तिहरू कपडाको सेतो झोला फ्याँकेर भागेको प्रहरीको भनाइ छ । झोलाभित्रबाट प्रहरीले १ केजी लेखिएको ८, २५० ग्राम लेखिएको २६ र ५०० ग्राम लेखिएको एक थान पहेंलाे धातु तथा दुई थान पेस्तोल र म्यागजिन पनि बरामद गरेको छ । परीक्षणको क्रममा उक्त धातुमध्ये सुनकाे जलप लगाइएकाे साढे १४ केजी चाँदी र आधा केजी मात्र सुन प्रमाणित भएको थियाे ।

घटनामा संलग्न रहेको आशंकामा तीनजना पक्राउ परेका छन् । पूर्वी नवलपरासीको दुम्कीबासबाट देवान पटेल, विजय पटेल र निलेश सखिया पक्राउ परेको प्रहरीले जनाएकाे छ ।

घटनाबारे छानविन गर्न महानगरीय प्रहरी अपराध महाशाखाका प्रमुख एसएसपी दीपक थापा नेतृत्वमा टोली बनेको छ । सो घटनाको घटनास्थलसमेत नक्कली बनाइएको खुलेको छ ।

प्रकाशित समय : २०:४९ बजे