कोरोना कहरका कारण यतिबेला संसार नै आक्रान्त भएका बेला नेपाल पनि त्यसबाट अछुतो रहन सकेन । चैत ११ गतेदेखि सरकारले कोरोनाको रोकथामका लागि गरेको लकडाउनका कारण मुलुकको समग्र आर्थिक क्षेत्र नराम्ररी प्रभावित भयो ।

अन्य क्षेत्र जस्तै बैंक तथा वित्तीय संस्थाको अवस्थासमेत कोरोनाका कारण जर्जर भएको छ । आर्थिक वर्ष ०७६/७७ मा हाल सञ्चालनमा रहेका २७ वाणिज्य बैंकको नाफामा उल्लेख्य गिरावट आएको छ । सञ्चालनमा रहेका कृषि विकास बैंक र प्रभु बैंकबाहेक २५ ‘क’ वर्गका वाणिज्य बैंकले आव २०७६/७७ को वार्षिक विवरण प्रकाशित गरेका छन् । उनीहरुले सार्वजनिक गरेको विवरणअनुसार कोरोनाका कारण वाणिज्य बैंकको नाफामा प्रत्यक्ष असर परेको छ ।

विश्वव्यापी रुपमा फैलिएको कोरोनाभाइरसको महामारीले वाणिज्य बैंकको नाफामा प्रत्यक्ष असर पारेको छ । बैंकहरुले सार्वजनिक गरेको अपरिष्कृत  वित्तीय विवरणअनुसार आ.व. ०७६/७७ मा कुल ५१ अर्ब १७ करोडबराबरको नाफा गरेका छन् । अघिल्लो वर्ष वाणिज्य बैंकहरूले ५७ अर्ब ४४ करोड नाफा गरेका थिए ।

अघिल्लो आवको तुलनामा गत आवमा बैंकहरुको नाफा झन्डै ११ प्रतिशतले घटेको छ । विवरणअनुसार बैंकको नाफा ६ अर्ब २७ करोडले घटेको छ । वित्तीय विवरण सार्वजनिक गरेका २५ वाणिज्य बैंकमध्ये १८ बैंकको नाफा अघिल्लो आवको तुलनामा घटेको छ भने सात वाणिज्य बैंकको नाफामा सामान्य वृद्धि भएको छ ।

आव ०७६/७७ मा सबैभन्दा कम नाफा गर्ने बैंकमा सिभिल बैंक छ । सो बैंकको नाफा ३५ प्रतिशतले घटेको छ । नेपाल एसबिआई बैंकको नाफा ३३.२२, कुमारी बैंकको ०.३१ प्रतिशतले घटेको छ । त्यस्तै माछापुच्छ्रे २६.२२, सानिमाको २४.५६, सिटिजन्स बैंकको २३.७२, नेपाल इन्भेस्टमेन्ट बैंकको २२.६३, बैंक अफ काठमाडौँको २२.२१ र नेपाल बंगलादेश बैंकको नाफा २०.७५ प्रतिशतले घटेको छ ।

यस्तै, स्ट्यान्डर्ड च्यार्टर्ड बैंकको १८.५१, सनराइजको १८.३५, एभरेस्टको १८.१४, नबिलको १५.८५ र राष्ट्रिय वाणिज्य बैंकको ११.७७ प्रतिशतले नाफामा गिरावट आएको छ । सिद्धार्थको ८.२६, हिमालयनको ८, नेपाल बैंकको १.५५ र कुमारी बैंकको ०.३१ प्रतिशतले नाफा घटेको छ ।

त्यसैगरी सेञ्चुरी बैंकको नाफामा ३३.९७, ग्लोबल आइएमईको ११, एनसिसीको १०.७४, प्राइमको ४.२७, एनआइसी एसियाको ३.२४ र एनएमबी बैंकको ०.५९ प्रतिशतले नाफा वृद्धि भएको छ ।

राष्ट्रिय वाणिज्य बैंकले चार अर्ब ४५ करोड नाफा आर्जन गरेको छ भने सिभिल बैंकले ४५ करोड ७० लाख नाफा आर्जन गरेको छ । नबिल बैंकले तीन अर्ब ५६ करोड, एनआइसी एसिया बैंकले तीन अर्ब १२ करोड नाफा कमाएको छ ।

गत वर्ष जनता बैंकलाई गाभेको ग्लोबल आइएमई बैंकले तीन अर्ब आठ करोड कमाएको छ । यस्तै नेपाल इन्भेस्टमेन्ट बैंकले दुई अर्ब ५७ करोड नाफा कमाएको छ । हिमालयन बैंकले दुई अर्ब ५४ करोड, माछापुच्छ्रे बैंकले एक अर्ब २५ करोड र सानिमा बैंकले एक अर्ब ७० करोड नाफा गरेको छ ।