राष्ट्रिय खेलकुद परिषद् (राखेप)ले खेलकुदको समग्र विकासका लागि खेलकुदसम्बन्धी छुट्टै विश्वविद्यालय स्थापना गरी व्यवस्थित अध्यापन गराउने उद्देश्यले खेलकुद विश्वविद्यालय कार्यदल गठन गरेकाे छ ।

राष्ट्रिय खेलकुद विकास ऐन २०७७ को दफा ४२ को उपदफा १ अनुसार ध्रुवबहादुर प्रधानको संयोजत्वमा १३ सदस्यीय कार्यदल गठन भएको हो । कार्यदलका सदस्यहरुमा गीता क्षेत्री राणा, युवराज लामा, रमेशराज पन्त, ओमकृष्ण प्रसाईं, डा. शुभेन्दु गुप्ता, रवि राजकर्णिकर, सूर्यबहादुर अधिकारी, नीलेन्द्रराज श्रेष्ठ, सुमन डीसी, सुजिना गुरुङ, डा. अचुतम लामिछाने र हरिहर श्रेष्ठ रहेका छन् ।

राखेपका सदस्य-सचिव टंकलाल घिसिङले उनीहरुलाई मंगलबार नियुक्ति पत्र हस्तान्तरण गरे । सो अवसरमा सदस्य-सचिव घिसिङले योजना बनाउन जत्ति जरुरी छ, त्योभन्दा पनि योजनालाई कार्यान्वयन तहमा पुर्‍याउनु अझ महत्वपूर्ण हुने बताए । 'कार्यदलमा विज्ञ र अनुभवी महानुभावहरु हुनुहुन्छ । यहाँहरुबाट मैले धेरै आशा गरेको छु,’ उनले भने ।

प्रकाशित समय : २३:३७ बजे