चर्चित सञ्चारकर्मी रवि लामिछानेले पत्रकारितालाई विट मार्दै राजनीतिमा होमिने घोषणा गरेसँगै उनकाे राजनीतिको रूपरेखाबारे धेरैले चासाे राखिरहेका छन् । लामिछानेले आगामी प्रतिनिधिसभा चुनावमा उठ्ने तयारीसाथ टेलिभिजनको जागिर छाडेका हुन् ।

काठमाडौंको ३ नम्बर क्षेत्रबाट चुनाव लड्ने चर्चा चलेपनि विस्तृत रूपमा सार्वजनिक भएकाे छैन् । उनले पार्टीबाट लड्ने कि स्वतन्त्र लड्ने भन्ने पनि खुलाएका छैनन् । ठिक यसैबेला आफूलाई विभिन्न पार्टीहरूबाट अफर आइरहेको तर निर्णय लिन बाँकी रहेको उनको भनाइ छ ।

लामिछाने कांग्रेस, एमाले र राप्रपाका विभिन्न तहका नेताहरूसँग संवादमा छन् । स्रोतका अनुसार उनको सबैभन्दा सघन र गम्भीर छलफल चाहिँ राप्रपा अध्यक्ष राजेन्द्र लिङदेनसँग भइरहेको छ । लिङदेनले लामिछानेलाई भेटेरै आफ्नो पार्टीमा आउन प्रस्ताव गरेको स्रोतकाे भनाइ छ । यसका लागि लागि राप्रपाका दुइ नम्बरी प्रवक्ता ज्ञानेन्द्र शाहीसमेत कसरतमा छन् ।

लामिछानेका ससुरा उद्धव पौडेल हालै मात्र राप्रपा नेपाल त्यागेर राप्रपामा फर्किएका थिए । पौडेलकै मध्यस्थतामा लिङ्देन र लामिछानेबीच संवाद जारी रहेको स्रोत बताउँछ । ‘अहिले पद वा जिम्मेवारीभन्दा पनि सैद्धान्तिक विषयमा छलफल भइरहेको छ,’ स्रोतले भन्यो ।

तर राप्रपाकाे मुद्धा राजसंस्थाप्रति सदाशयता राख्ने भएकाले लामिछाने आफूलाई ‘राजावादी’ का रूपमा चिनाउन चाहँदैनन् । उता उनलाई स्वतन्त्र रूपले चुनाव लड्नका लागि समर्थकहरूले सुझाव दिइरहेका छन् ।

प्रकाशित समय : १३:३६ बजे