संखुवासभाको मकालु वरुण राष्ट्रिय निकुञ्जबाट बहुमूल्य जडीबुटी यार्सागुम्बा संकलन सुरु भएको छ । दुई वर्षदेखि रोकिएको यार्सागुम्बा संकलन कार्य जेठ १० गतेदेखि सुरु गरिएको निकुञ्जले जनाएको छ ।

निकुञ्जका कार्यालय प्रमुख रामदेव चौधरीका अनुसार कोरोना भाइरस संक्रमणका कारण दुई वर्षदेखि निकुञ्जले यार्सागुम्बा संकलनमा रोक लगाएको थियो । उक्त निकुञ्ज क्षेत्रमा दुई प्रजातिका यार्सा पाइन्छ । कार्यालयले सोलुखुम्बुको महाकुलुङ र छेस्काम मध्यवर्ती उपभोक्ता समिति, संखुवासभाकाे किमाथांका मध्यवर्ती उपभोक्ता समिति, चेपुवा, अरुण वरुण, मकालु, पाथीभरा, सेदुवा, पुखुवा, सिलिचोङ, मांतेवा, ताम्कु, बाला र सिसुवा मध्यवर्ती उपभोक्ता समितिमार्फत पुर्जी दिने व्यवस्था गरेको छ । अनुमति लिएका व्यक्ति वा समूहले जेठ १० गतेदेखि असार १० गतेसम्म यार्सा संकलन गर्न पाउने छन् ।

यार्सागुम्बा मकालु गाउँपालिका, भोटखोला र सिलिचोङ गाउँपालिका क्षेत्रको मकालु वरुण निकुञ्जलगायत ठाउँमा पाइन्छ । उच्च हिमाली क्षेत्रका बासिन्दाको मुख्य आम्दानीको स्रोत यार्सागुम्बा मानिन्छ । संकलित यार्सागुम्बा बिक्रीमार्फत उनीहरुले वर्षभरिको आवश्यक घर खर्च, बालबच्चा पढाउने गरेका स्थानीयको भनाइ छ ।

यार्सागुम्बा संकलन गर्न निकुञ्ज कार्यालयले मध्यवर्ती क्षेत्रभित्रका स्थानीयलाई ५००, मध्यवर्ती क्षेत्र बाहिरका तर जिल्ला भित्रकालाई दुई हजार र जिल्ला बाहिरकाको लागि तीन हजार रूपैयाँ प्रवेश शुल्क तोकेको छ । निकुञ्जले विगतका वर्षमा यार्साबाट वार्षिक ५० लाख रूपैयाँ बढीको राजस्व संकलन गर्ने गरेको छ । गुणस्तरका आधारमा १ नम्बरको यार्सागुम्बालाई केजीको ४० लाखसम्ममा बिक्री हुने गरेको भए पनि संखुवासभाकाे यार्सा गुम्बाप्रति केजी साढे पाँच लाखदेखि साढे सात लाख रूपैयाँसम्ममा किनबेच हुने गरेको व्यापारीको भनाइ छ ।

यसरी संकलन गरिएको यार्सा चीनको तिब्बती तथा काठमाडौँमा बढी निकासी हुने गरेको छ । निकुञ्ज संखुवासभा र सोलुखुम्बुको एक हजार ५०० वर्ग किलोमिटरमा फैलिएको छ ।

प्रकाशित समय : १९:१७ बजे