काठमाडौं महानगरपालिकामा प्रमुख पदका लागि स्वतन्त्र उम्मेदवार बालेन साहले दोब्बरको अग्रता बनाएका छन् । पछिल्लो  मतपरिणामअनुसार प्रमुख पदका स्वतन्त्र उम्मेदवार साहले ६ हजार ४८६ मत प्राप्त गरेका छन् ।

नेकपा एमालेका केशव स्थापितले ३ हजार ४१३ मत र नेपाली कांग्रेसकी सिर्जना सिंहले ३ हजार ९ मत प्राप्त गरेकी छन् । एमालेको तर्फबाट उपप्रमुख पदको उम्मेदवार सुनिता डंगोलले पाँच हजार ८९६, नेकपा (एकीकृत समाजवादी) का रामेश्वर श्रेष्ठले एक हजार ६३२ मत प्राप्त गरेका छन् ।

निर्वाचन कार्यालयले गणना केन्द्र थप गर्ने तयारी गरेको पनि जनाएको छ । हाल राष्ट्रिय सभागृहबाट काठमाडौं महानगरको मत गणना भइरहेको छ । अहिले २, ३, ४, ५, ३१ र ३२ काे मतगणना कार्य भइरहेको छ । वडा नम्बर १ को मतपरिणाम आइतबार नै सार्वजनिक भइसकेको छ । मत परिणामअनुसार एमालेका उम्मेदवार भरतलाल श्रेष्ठ अध्यक्ष पदमा विजय भएका छन् ।

केही समयभित्र वडा नम्बर २ को पनि मतपरिणाम सार्वजनिक गरिने काठमाडौं जिल्लाका निर्वाचन अधिकृत प्रेमकुमार श्रेष्ठले जानकारी दिए । काठमाडौंमा हालसम्म १४ हजार ७७८ मत गणना भएको जनाइएको छ ।

प्रकाशित समय : १५:५४ बजे