गण्डकी । पोखरामा क्रियाशील नेपाल भूतपूर्व खेलाडी मञ्चमा स्थापित राष्ट्रिय खेलकुद पुरस्कार नेपाली खेलकुद क्षेत्रमा योगदान पुर्‍याएबापत शरद्चन्द्र शाहलाई मरणोपरान्त प्रदान गरिएको छ । मञ्चको रजत महोत्सव समापन समारोहमा दिवङ्गत शाहका परिवारजनलाई उक्त पुरस्कार समर्पण गरिएको हो ।

एक लाखसहित पदक र सम्मानपत्र पोखरा महानगरपालिकाका प्रमुख धनराज आचार्य, मञ्चका अध्यक्ष दिलबहादुर गुरुङलगायतले संयुक्त रूपमा दिवङ्गत शाहका श्रीमती रमा शाह र छोरी मिमोही शाहलाई हस्तान्तरण गरिएको थियो । नेपाली खेलकुद क्षेत्रको विकासमा पुर्‍याएको उल्लेखनीय योगदानको कदर गर्दै शाहलाई मरणोपरान्त पुरस्कार प्रदान गरिएको मञ्चका अध्यक्ष गुरुङले बताए ।

दिवङ्गत शाहले विसं २०३४ देखि २०४५ सम्म राष्ट्रिय खेलकुद परिषद्को सदस्य सचिवका रूपमा जिम्मेवारी सम्हालेका छन। राष्ट्रिय खेलकुद प्रतियोगिता, नगर खेलकुद प्रतियोगिता तथा दक्षिण एसियाली खेलकुद प्रतियोगितालाई संस्थागत र चलायमान बनाउन उनको महत्वपूर्ण भूमिका रहेको थियो ।

मञ्चका संस्थापक खड्क रानाभाटले उक्त पुरस्कार स्थापना गरेका हुन । हरेक दुई वर्षमा राष्ट्रियस्तरमा उक्त पुरस्कार प्रदान गर्ने गरिएको मञ्चका अध्यक्ष गुरुङले बताए । मञ्चले पोखरा अन्तरराष्ट्रिय म्याराथनको आयोजना गर्दै आएको छ ।

प्रकाशित समय : १६:१२ बजे