डोटीमा बस दुर्घटना हुँदा ३० जना घाइते भएका छन् । धनगढीबाट बाजुरा जाँदै गरेको मालिका यातायातको सुपप्र ०१ ००१ ख ३१०८ नम्बरको बस दुर्घटना भएको हो । बस डोटीको पूर्वीचौकी गाउँपालिका-४ सानागाउँमा बिहीबार बिहान ६ बजेतिर दुर्घटनामा परेको जिल्ला प्रहरी कार्यालय डोटीका डीएसपी भोला भट्टले जानकारी दिए ।

शुक्रबार हुने स्थानीय तहको निर्वाचनका लागि मतदान गर्न भारतलगायत तराईका जिल्ला कैलाली र कञ्चनपुरबाट घर फर्किने यात्रु बोकेको बस दुर्घटनामा परेको हो । घाइतेहरूको उद्धारमा प्रहरी, नेपाली सेना, निर्वाचनका लागि पालिकामा खटिएका निर्वाचन अधिकृत प्रकाशबहादुर भण्डारी, स्थानीयबासी लगायतका खटिएका छन् ।

प्रहरीका अनुसार घाइतेहरु मध्ये १६ जनाको जिल्ला अस्पताल डोटीमा उपचार भइरहेको छ भने १३ जनाको स्थानीय क्लिनिकमा उपचार भइरहेको छ । गम्भीर घाइते एक जनालाई धनगढीका लागि रिफर गरिएको छ ।

बस चालक फरार रहेको र उनको खोजी कार्य भइरहेको डिएसपी भट्टले जानकारी दिए । घटनाको बारेमा प्रहरीले थप अनुसन्धान गरिरहेको छ । बस सडकबाट करिब १५/२० मिटर तल खसेको जनाइएको छ ।

प्रकाशित समय : १६:४४ बजे