कतारी राजकुमारी शेखा आश्मा अलथानी ८,५८६ मिटरको उचाइको विश्वको तेस्रो अग्लो हिमाल कञ्चनजंघाको शिखरमा पुग्ने पहिलो अरब महिला बनेकी छन् । आफ्नो इन्स्टाग्राममा स्टाटस राख्दै शेखा आश्माले कञ्चनजंघा शिखरमा पुग्ने पहिलो अरब नागरिक हुन पाएकोमा गर्व लागेको उल्लेख गरेकी छन् ।

उनले आफ्नो सफलताका पछाडि बलियो टिमको साथ र सहयोग रहेको पनि उल्लेख गरेकी छन् । निर्मल पुर्जा लगायतका टीमले उनलाई शिखरमा पुग्न सहयोग गरेका थिए । ‘म केही दिन बिरामी परेकी थिएँ, त्यसैले आँटेको हिमाल चढ्न सक्दिनँ झै लागेको थियो । तर, जम्मा दुइ दिनमै भव्य कञ्चनजंघाको सफल आरोहण गरेँ,’ उनले आफ्नो पोष्टमा लेखेकी छन्, ‘हिमाल चढ्न सहज थिएन र यसले मलाई अझै हिम्मत दिएको छ । कञ्चनजंघा विश्वको तेस्रो अग्लो हिमाल हो, यो हिमालको सफल आरोहणसँगै मेरो उत्साह बढेको छ र अझै उच्च शिखर चुम्ने बाटोमा अघि बढ्न प्रेरणा मिलेको छ ।’

कतारी राजकुमारी केही समय हिमाल आरोहणमै रहने र सगरमाथा आरोहणको प्रयास गर्ने बताइएको छ । यसअघि शेखा आश्माकाे सगरमाथा आरोहण गर्ने प्रयास असफल भएकाे थियाे ।

प्रकाशित समय : १९:३४ बजे