नेपाल पर्यटन बोर्डका सदस्य तथा पर्यटन व्यवसायी ङावा ङिमा शेर्पालाई कोरियन सरकारले कोरियन अल्पाइन फेडेरेशनको नेपालस्थित लियजन अफिसको अध्यक्षका रुपमा नियुक्त गरेको छ । कोरियाको राजधानी सियोलमा आयोजित फेडेरेशनको ६०औं वार्षिकोत्सवका अवसरमा आयोजित समारोहमा शेर्पालाई नेपालको सम्पर्क कार्यालयको अध्यक्षको प्रमाणपत्र प्रदान गरिएको हो ।

कोरियाका पूर्वराष्ट्रपति मुन जे उनकै पालामा उनको सरकाले नेपालको लियजन अफिसको प्रेसिडेन्ट बनाउने निर्णय गरे पनि कोभिड महामारीका कारण दुई वर्षपछि शेर्पालाई यो प्रमाणपत्र दिइएको हो । सियोलमा आयोजित कार्यक्रममा कोरियन अल्पाइन फेडरेशनका अध्यक्ष डा. सोन जुङ होले शेर्पालाई प्रमाणपत्र हस्तान्तरण गरेका थिए । सो कार्यक्रममा शेर्पा र उनकी श्रीमती राजेश्वरीलाई सम्मान गरिएको थियो । सन् १९९५ देखि कोरियन पर्यटक तथा पर्वतारोहीसँग काम गर्दै आएका शेर्पाले अब नेपालस्थित सम्पर्क कार्यालयको अध्यक्षको हैसियतमा कोरियाबाट नेपाल आउने पर्वतारोहीहरुको समन्वय र सम्पर्क लगायतको जिम्मेवारी बहन गर्नेछन् ।

सम्मानपछि प्रतिक्रिया दिँदै शेर्पाले कोरियन सरकारबाट प्राप्त यो जिम्मेवारी र सम्मान सम्पूर्ण नेपाल र नेपालीप्रति गरिएको सम्मान भएको बताए । उनले नेपालमा कोरियन पर्यटक भित्र्याउन आफूले सक्दो पहल गर्ने बताए । शेर्पालाई कोरियन नागरिकलाई नेपालमा सेवा र सहयोग गरेकोमा उत्कृष्ट कार्य सम्पादनबापत कोरियाको देइजोन नगरपालिकाले 'सफल कार्य सम्पादन सम्मान २०१८'बाट सम्मान गरेको थियो ।

अल्पाइन फेडेरेशनको नेपालस्थित लियजन अफिसबाट अनुमति लिएर मात्रै  हिमाल चढ्न जाने आरोहीले पनि अन्य प्रक्रिया सुरु हुनेछ । यस्तै नेपालबाट खेलकुदका कार्यक्रम लिएर नेपाली टोली कोरिया जाने क्रममा पनि सोही कार्यालयमा समन्वय गर्नुपर्ने शेर्पाले जानकारी दिए । कोरियन अल्पाइन फेडरेशनले कोरिया सरकारको खेलकुद र पर्वतारोहणसम्बन्धी अधिकांश कामको अनुमति दिने सरकारी एजेन्सीका रुपमा काम गर्छ । कोरियन पर्यटकहरु लक्षित सोरा ट्राभल्स एण्ड टुर्स र सियोल जीब कोरियन रेष्टुरेन्टका सञ्चालकसमेत रहेका शेर्पाले कोरियाबाट नेपाल आउने उच्चस्तरीय प्रतिनिधिमण्डलको समन्वय गर्दै आएका छन् ।

सोरा एड्भन्चर ट्रेक्स एण्ड एस्पिडिसनका सञ्चालक शेर्पा सन् २०१९ देखि सियोल नेशनल युनिभर्सिटीको नेपाल प्रतिनिधिसमेत हुन् ।