नेशनल प्याब्सन भक्तपुरले पूर्वप्राथमिक तह स्तरोन्नतिका लागि शिक्षकहरुको पेशागत क्षमता एवं व्यक्तित्व विकास विषयक अभिमुखीकरण कार्यक्रम सम्पन्न गरेको छ । आफ्ना सदस्य विद्यालयहरुमा शिक्षाको जगको रुपमा रहेको पूर्वप्राथमिक तह सुदृढ गर्ने उद्देश्यले 'पूर्वप्राथमिक तह स्तरोन्नति-२०७८' कार्यक्रमको सुरुवात गरेसँगै शनिबार अभिमुखीकरण कार्यक्रम आयोजना गरिएकाे हाे ।

यही चैत्रबाट सदस्य विद्यालयरुमा सुरु गरिने 'पूर्वप्राथमिक तह स्तरोन्नति-२०७८' कार्यक्रम हरेक विद्यालयमा पुर्‍याउनुअघि सहजीकरणको लागि कार्यक्रम आयोजना गरिएको नेशनल प्याब्सन भक्तपुरले जनाएकाे छ । नेशनल प्याब्सन भक्तपुरका अध्यक्ष एवं मदरल्याण्ड स्कुलका सञ्चालक/प्रिन्सिपल संजय खड्काले प्रि-स्कुलका शिक्षकहरुको स्तर बढेपछि मात्र स्कुलले प्रगति गर्न सक्ने बताए । 'असारमा ध्यान रोपेर मंसिरमा राम्रो फल पाउन उचित मलजल र गोडमेल गर्नु परेजस्तै शिक्षकहरुका लागि पनि निरन्तर क्षमता अभिवृद्धिका कार्यक्रम गर्नुपर्छ,' उनले भने । निजी विद्यालयको स्तरोन्नति भए मात्र शिक्षकहरुलाई पनि प्रोत्साहन सुविधाहरु दिन सकिने भएकाले पूर्वप्राथमिकका शिक्षकहरु नै स्कुलको शैक्षिक जग भएकाले परिस्कृत रुपमा आफ्नो विद्यालयमा कार्य गर्न उनले आग्रह गरे  ।

अध्यक्ष खड्काले मन्टेश्वरीको बोर्ड र प्ले स्टेसन हुँदैमा राम्रो इसीडी तथा प्रि-स्कुल नहुने भएकाले निरन्तर तालिम र शिक्षकहरुलाई पुनर्ताजगी प्रदान गरी शैक्षिक प्रवर्द्धनका लागि अगाडि बढ्नुपर्ने बताए । कार्यक्रममा १४६ जना शिक्षकहरु सहभागी थिए ।

कार्यक्रममा फिनिक्स मन्टेश्वरीकी सञ्चालिका एवं प्रशिक्षकद्वय रीता घिमिरे तिमिल्सिना र रीता आचार्यले सहजीकरण गरेका  थिए । नेशनल प्याब्सन भक्तपुर र फिनिक्स मन्टेश्वरी तालिम सेन्टर कुमारीपाटीबीच सहकार्यको ३ वर्षे सम्झौता भएकाले विद्यालयलाई मजबुत बनाउन फिनिक्स मन्टेश्वरीले शिक्षकहरुलाई तालिम दिने, अभिभावक शिक्षा सञ्चालन गर्ने र आवश्यक शैक्षिक परामर्शसमेत दिने लगायतका कार्यमा सघाउने नेशनल प्याब्सनका सचिव तथा इडेन गार्डेन स्कुलका प्रिन्सिपल जय प्रकाश राईले बताए ।