बेस्ट फाइनान्स कम्पनी लिमिटेडले आज (शुक्रबार चैत ४ गते० २५ औँ वार्षिक साधारण सभा सम्पन्न गर्दैछ । नेपाल प्रज्ञा प्रतिष्ठान कमलादी, काठमाडौंमा बिहान १२ः३० बजेदेखि सभा डाकिएको छ ।

गत आर्थिक वर्ष २०७७/७८ को नाफाबाट सेयरधनीलाई लाभांश वितरणको कुनैपनि प्रस्ताव नगरेको फाइनान्सले सामान्य प्रस्तावहरु मात्रै छलफल गरी पारित गर्दैछ । आर्थिक वर्ष २०६७.६८ यता लाभांश वितरण नगरेको फाइनान्सले गत आर्थिक वर्षबाट पनि लगानीकर्तालाई लाभांश वितरण नगरेको हो । यो पटक पनि फाइनान्सको लगानीकर्ताको हात रित्तो भएको छ ।

सभामा बेस्ट फाइनान्स कम्पनी र अन्य बैंक तथा वित्तीय संस्थासँग मर्ज वा एक्वायर हुनु परेमा त्यसको सम्पूर्ण जिम्मेवारी सञ्चालक समितिलाई दिने, उक्त समझदारी पत्रमा हस्ताक्षर गर्न, चल अचल सम्पत्ति र दायित्व मुल्यांकन गर्न मान्यता प्राप्त मुल्यांकन कर्ता नियुक्त गर्न, निजको पारिश्रमिक तोक्न लगायत मर्जर सम्बन्धी अन्य आवश्यक प्रक्रिया पूरा गर्न सञ्चालक समितिलाई अख्तियारी प्रदान गर्ने पनि बताइएको छ ।

यस्तै आर्थिक वर्ष २०७७/७८ को वार्षिक वित्तीय विवरण, नाफा-नोक्सान हिसाब लगायतलाई पारित गर्ने, कम्पनीको प्रबन्धपत्र तथा नियमावली संशोधन गर्ने अख्तियारी पनि सञ्चालक समितिलाई दिने प्रस्ताव पनि सभामा छ ।

सभाले आर्थिक वर्ष २०७८/०७९ को लेखापरीक्षण गर्नका लागि सञ्चालक समितिबाट गरिएको लेखापरीक्षकको नियुक्ती र पारिश्रमीक तोक्ने प्रस्ताव पारित गर्ने छ ।

साधारण सभा प्रयोजनका लागि बेस्ट फाइनान्सले फागुन २० गते सेयर दाखिल खारेजी (बुकक्लोज) गरेको थियो । बुकक्लोज अनुसार फागुन १९ गतेसम्म नेप्सेमा सेयर कारोबार भई कायम रहने सेयरधनीले मात्रै साधारण सभामा प्रतिनिधित्व जनाउन सक्नेछन् ।

प्रकाशित समय : १७:५३ बजे