गृहपृष्ठ चुनाव लड्न पहिला जनप्रतिनिधिको राजीनामा
चुनाव लड्न पहिला जनप्रतिनिधिको राजीनामा
बैशाख ३० मा तोकिएको स्थानीय तहको निर्वाचन आउन अब मात्र ५७ दिन बाँकी छ । निर्वाचन आयोगले चुनावका सबै तयारी तीव्र गतिमा चलाइरहेको छ भने खेलाडीका रुपमा रहेका राजनीतिक दलहरुसमेत मैदानमा उत्रिएका छन् ।
नेपाली कांग्रेस नेतृत्वको सत्ता गठबन्धनसहित प्रमुख प्रतिपक्ष दल नेकपा एमालेसमेत चुनावी गतिविधिसहित घरदैलो केन्द्रीत बनेका छ । दलहरु पूर्णतः चुनावी सरमर्गीमा डुबेका छन् । स्थानीय तहको निर्वाचनमा उम्मेद्वार छनोट गर्न पार्टीले विधि निर्माण गरिरहेका छन् । नेकपा एमालेले भर्खरैमात्र उम्मेद्वार छनोटको विधि तयार पारेको छ भने अन्य दल पनि त्यसको तयारीमै छन् ।
स्थानीयस्तरका नेताहरु भने आ-आफ्नै तयारीका साथ चुनावी मैदानमा छन् । विगत पाँच बर्षदेखि स्थानीय तहको नेतृत्व गरेका जनप्रतिनिधिसमेत कार्यकाल दोहोर्याउनका लागि रस्साकस्सी चलाइरहेका छन् । ठिक यसैबेला कार्यकाल दोहोर्याउने तयारीमा रहेका जनप्रतिनिधिहरुलाई निर्वाचन आयोगको आचारसंहिताले संकटमा पारेको छ । अब उम्मेद्वार बन्न चाहने जनप्रतिनिधिले पहिला पदबाट राजीनामा दिनुपर्ने भएको छ ।
सरकारी स्रोतको दुरुपयोग गर्न सक्ने भन्दै निर्वाचन आयोगले नयाँ आचारसंहितामा यस्तो प्रावधान राखेको हो । आयोगका प्रवक्ता शालिग्राम पौडेलले आचारसंहिता कानुन मन्त्रालयबाट सम्पादन भएर आएपछि राजपत्रमा प्रकाशनका लागि बुधबार साँझ पठाएको बताए ।
स्थानीय तहबाट पारिश्रमिक लिने व्यक्ति उम्मेदवार हुन नपाउने प्रावधान रहेकाले आचारसंहितामा यो प्रावधान राखिएको आयोगले जनाएको छ । ऐनको दफा १३ ‘घ’ मा स्थानीय तहबाट पारिश्रमिक पाउने गरी बहाल रहेको व्यक्ति उम्मेदवार हुन योग्य नहुने उल्लेख छ । जनप्रतिनिधिले पारिश्रमिक नलिए पनि सुविधा लिइरहेका हुन्छन् । उनीहरूले निर्वाचनमा भाग लिनुअघि राजीनामा नदिए उम्मेदवार बन्न रोक लगाउने प्रावधान आचारसंहितामा छ ।
आचारसंहितामा स्थानीय तहको निर्वाचनमा उम्मेदवार बन्न चाहनेले आफू निर्वाचित, मनोनीत वा नियुक्त भएको निकायबाट लिएको पेस्की र आफ्नो नाममा रहेको बेरुजुसमेत फर्स्योट गर्नुपर्ने प्रावधान छ ।
अब पुनः कार्यकाल दाेहाेर्याउने याेजना बुनिरहेका र चुनावी मैदानमा हाेमिएका जनप्रतिनिधिले पहिला राजीनामा अनि मात्र उम्मेद्वारीकाे बाटाे अपनाउनु पर्नेछ ।
प्रकाशित समय : १४:४४ बजे
