युद्धविरामको घोषणा गरेकै सहरमा रुसले हमला गरेको युक्रेनको दाबी छ । रुसले हमला जारी राखेपछि युद्धग्रस्त क्षेत्रबाट मानिसहरुलाई सुरक्षित स्थानमा पठाउन समस्या भएको युक्रेनी अधिकारीहरुले बताएका छन् ।

शनिबार युक्रेनका दक्षिण पूर्वी दुई सहर मारियुपोल र भोनोभाखामा रुसले अस्थायी युद्धविरामको घोषणा गरेको थियो । तर आधा घण्टाभन्दा कम समय मात्रै युद्ध रोकेको रुसले पुनः हमला गर्न थालेपछि हजारौं नागरिकलाई सुरक्षित तरिकाले बाहिर निकाल्ने काम प्रभावित भएको युक्रेन अधिकारीलाई उद्धृत गर्दै बीबीसीले जनाएको छ ।

रुसले युक्रेनमा आक्रमण सुरु गरेको आज ११औं दिन हो । राजधानी किभको उत्तर पश्चिम क्षेत्रका सहरहरुमा रुसी सेनाले आक्रमण जारी राखेका छन् । यहाँबाट मानिसहरु अति आवश्यक सामानहरु बोकेर सुरक्षित स्थानमा जाने कोसिस गरिरहेका छन् ।

यसैबीच युक्रेनका राष्ट्रपति भ्लोदिमिर जेलेन्स्कीले अमेरिकी संसदलाई सम्बोधन गर्दै युक्रेनलाई फाइटर जेट दिन र रुसबाट तेल खरिदमा प्रतिबन्ध लगाउन माग गरेका छन् । अमेरिकी कांग्रेसका करिब ३०० सदस्यहरुलाई भर्चुअल रुपमा सम्बोधन गर्दै जेलेन्स्कीले उक्त माग राखेको बीबीसीले जनाएको छ । सम्बोधनको क्रममा उनले युक्रेनको आकाशलाई हवाई निषेधित क्षेत्र घोषणा गर्नुपर्ने माग फेरि पनि राखेका थिए ।

प्रकाशित समय : १४:५४ बजे