प्रधानमन्त्री शेरबहादुर देउवाले अमेरिकी अनुदान परियोजना संसद्‌बाट अनुमोदन गराउन निर्णायक दौडधुप चलाएका छन् । देउवाले सत्ता साझेदार र विपक्षी दलहरूसँगको संवादलाई समानान्तर तरिकाले अघि बढाएका हुन् ।

मंगलबार रातिसम्म सरकारी निवास बालुवाटारमै विपक्षी दल नेकपा एमालेका अध्यक्ष केपी शर्मा ओलीसँग संवाद गरेका देउवाले बुधबार बिहानैदेखि संवादलाई थप गति दिएका हुन् ।

बुधबार बिहानै प्रधानमन्त्रीको सन्देश बोकेर गृहमन्त्री बालकृष्ण खाण नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ निवास खुमलटार पुगेका थिए । प्रचण्डसँगको भेटमा खाणले एमसीसी पारित गर्नुपर्ने बताएका थिए । उनीहरुबीचको भेटमा अर्थमन्त्री जनार्दन शर्मा समेत सरिक थिए ।

लगत्तै खुमलटारबाट बालकोट हानिएका खाणले एमाले अध्यक्ष ओलीसँग पनि निर्णायक भेटवार्ता गरेका हुन् । करिब ४५ मिनेट छलफल गरेका उनले भोलिको संसदमा एमसीसीबारे छलफल हुने र सहयोगका लागि अनुरोध गरेको बालकोट स्रोतको भनाइ छ ।

प्रधानमन्त्री देउवा एमसीसी अनुमोदन गर्न सकेसम्म सर्वदलीय सहमति जुटाउने, नभए सत्ता गठबन्धनमा मात्रै भए पनि सहमति गरेर एमसीसी अनुमोदन गराउने प्रयास गरिरहेका छन् । तर‚ सत्ता गठबन्धनभित्र दलहरूबीच सहमति नभए प्रमुख प्रतिपक्ष एमालेसँग मिलेर भए पनि एमसीसी पारित गर्ने गरि दौडधुप चलाएका छन् ।