प्रधानन्यायाधीश चोलेन्द्र शमशेर जबराविरुद्ध नेपाल बार एसोसिएसनले थालेको आन्दोलन अन्तर्गत आज पनि देशभरका उच्च अदालतमा प्रर्दशन सुरू भएको छ । उपत्यकाको उच्च अदालत पाटनसहित देशभरका १८ उच्च अदालतमा बारले २ घन्टा कालोपट्टीसहितको धर्ना र विरोध कार्यक्रम गर्दै छ ।

करिब एक महिनादेखि चलिरहेको बारको आन्दोलनअन्तर्गत बुधबार उच्च अदालतहरूमा प्रदर्शन गरिएको हो । सर्वोच्च अदालतमा धर्नासहित उच्चमा पनि आन्दोलनका कार्यक्रम विस्तार गरिएको बारले जनाएको छ । बारले अहिले सर्वोच्च अदालतमा नारा जुलुससहित धर्ना दिइरहेको छ ।

उच्च अदालत पाटनमा बार अध्यक्ष चण्डेश्वर श्रेष्ठ आफैं जाने छन् । उच्च अदालत इलामको विरोध सभालाई सम्बोधन गर्न बारका पूर्वउपाध्यक्षद्वय कुमार शर्मा आचार्य र मदन खड्काका साथै केन्द्रीय सदस्य खिमानन्द अधिकारी त्यहाँ पुगेका छन् । धनकुटा उच्च अदालतमा उपाध्यक्ष मानबहादुर रुम्दाली र पूर्वकोषाध्यक्ष मोहन इङ्नाम खटिएका छन् । विराटनगर उच्च अदालतमा बारका पूर्वउपाध्यक्षहरू टीकाराम भट्टराई र सीताराम राईलाई जिम्मेवारी दिइएको छ । त्यहाँ केन्द्रीय सदस्य मनोजकुमार चौधरीलाई पनि पठाइएको  छ। पूर्वमहासचिव र उपाध्यक्षहरुलाई पनि उच्च अदालत तोकिएको छ ।

बारले धर्ना दिइरहँदा प्रधानन्यायाधीश चोलेन्द्र शम्शेर जबराले आजका लागि १० वटा इजलास तोकेका छन् । जबराले ८ संयुक्त र दुई एकल इजलास तोकेका छन् । कुल २ सय २६ थान मुद्दा पेसीमा चढेको छ ।

प्रकाशित समय : १८:१३ बजे