भारतमा कोरोनाभाइरसबाट संक्रमित भएका सक्रिय संक्रमितहरुको संख्या धेरै कम देखिएको छ । सरकारी अधिकारीहरुले आइतबार दिएको जानकारीअनुसार भारतमा अहिले सन् २०२० को मार्चपछिकै सबैभन्दा थोरै सक्रिय संक्रमितहरु रहेका छन् । उनीहरुका अनुसार भारतमा अहिले संक्रमित अवस्थामै रहेकाहरुको कुल संख्या एक लाख ३५ हजार ९८१ रहेको छ ।

'कुल संक्रमितमध्ये अहिले एक प्रतिशतभन्दा कम मात्रै सक्रिय संक्रमित रहेका छन्, यो संख्या पछिल्ला ५२२ दिन अर्थात १७ महिना पछिकै सवैभन्दा कम हो,' केन्द्रीय स्वास्थ्य मन्त्रालयको वक्तव्यमा उल्लेख छ । त्यसैगरी पछिल्लो २४ घण्टामा भारतमा ११ हजार २७१ जना नयाँ संक्रमित थपिएको पनि मन्त्रालयले जनाएको छ । मन्त्रालयका अधिकारीहरुका अनुसार सोही अवधिमा कोरोनाभाइरसका कारण थप २८५ जनाको मृत्यु भएको छ ।

भारतमा अहिलेसम्म कोरोनाभाइरसका कारण मृत्यु भएकाहरुको कुल संख्या चार लाख ६३ हजार ५३० पुगेको मन्त्रालयको विवरणमा उल्लेख छ । पछिल्लो एक दिनमा नयाँ थपिएका संक्रमित मध्ये छ हजार ४६८ जना केरला राज्यका मात्रै रहेका छन् । भारतमा कोरोनाका कारण अहिले सबैभन्दा बढी प्रभावित केरलामा एक दिनमा मात्रै २३ जनाको मृत्यु भएको छ । पछिल्लो २४ घण्टामा भारतमा १२ लाख ५५ हजार ९०४ जनाको कोरोना परीक्षण गरिएको मन्त्रालयले जनाएको छ ।

प्रकाशित समय : २१:३२ बजे