काठमाडाैंको तार्केश्वरबाट चोरीको मोटरसाइकलसहित एक जनालाई महानगरीय ट्राफिक प्रहरी महाशाखाले नियन्त्रणमा लिएको छ । सादा पोसाकमा खटिएको ट्राफिक प्रहरी टोलीले तार्केश्वर नगरपालिका-४, पुरानो गुहेश्वरीबाट कालो रंङको २०० सीसीको एनएस पल्सर मोटरसाइकलको वास्तविक नम्बर परिवर्तन गरि बा. प्र. ०२-०१८ प ४३०१ नम्बर हालेर चलाइरहेको अवस्थामा कीर्तिपुर नगरपालिका वडा नं. २ चाँदनी चोक बस्ने वर्ष २८ को बुद्ध बहादुर तामाङलाई मोटरसाइकलसहित नियन्त्रणमा लिएको महाशाखाका एसएसपी उपरीक्षक जनक भट्टराईले जानकारी दिए । 

उक्त मोटरसाइकलको वास्तविक नम्बर प्र.३-०२-०१० प ६९०३ रहेको खुल्न आएको पनि उनले बताए । पक्राउ भएको मोटरसाइकल २०७७ सालको फाल्गुन महिनामा नरेफाँटबाट हराएको भनी काठमाडाैं-३२, कोटेश्वर बस्ने अनिमेष श्रेष्ठले हुलियासहितको निवेदन ट्राफिक महाशाखामा दिएका थिए । पक्राउ गरिएको व्यक्तिसहित उक्त मोटरसाइकललाई चोरी मुद्दाका अनुसन्धान कारबाहीका लागि महानगरीय प्रहरी वृत्त बानेश्वरमा पठाइएको छ ।

प्रकाशित समय : १३:१६ बजे