एनआइसी एशिया बैंकले ग्राहकसमक्ष ल्याएको सुपर चमत्कारिक बचत खाता योजनाअन्तर्गत घातक रोगको उपचारबापत १० लाख रुपैयाँ बिमा रकम भुक्तानी गरेको छ । बैंकको काठमाडौंस्थित तीनचुली शाखामा सुपर चमत्कारिक बचत खाता ‘गोल्ड श्रेणी’को खाता खोलेका गोकर्णेश्वर नगरपालिका- ९ अत्तरखेलका ५७ वर्षीय केदार कुमार उदासलाई बिमा रकम भुक्तानी गरिएको हो । 

उदासलाई बैंकका सहायक प्रमुख कार्यकारी अधिकृत सन्तोष कुमार राठीले उक्त रकम बराबरको चेक हस्तान्तरण गरे । उत्तरदायी बैंकिङको अभ्यास गर्दै आएको एनआइसी एशिया बैंकले खातावालालाई बचतसँगै बिमा सुविधा उपलब्ध गराउने उद्देश्यले उक्त बिमा रकम एभरेष्ट इन्स्योरेन्ससँगको सहकार्यमा खातावालालाई भुक्तानी गरिएको हो । 

हाल बैंकको न्यू प्रिमियम सुपर चमत्कारिक बचत खाता ‘डायमण्ड श्रेणी’का ग्राहकहरूलाई भविष्यमा आइपर्न सक्ने भवितव्यको लागि चाहिने आर्थिक स्रोतको जोहो गर्न बैंकले बिमा सुविधा प्रदान गर्दै आएको छ । यस बचत योजनामा १८ वटा विभिन्न घातक रोगको उपचारका लागि १० लाख, दुर्घटनाबाट पूर्ण रुपमा घाइते वा मृत्यु भएका व्यक्ति वा परिवारलाई १० लाख र मेडिकल जाँचमा हुने अस्पताल खर्चबापत १ लाख (अस्पताल भर्नामा ८० हजार र बहिरंग उपचारमा २० हजार)सँगै विभिन्न निःशुल्क सुविधासमेत ग्राहकहरूले पाउनेछन् । बैंकको बिमा सहितको निक्षेप योजनाअन्तर्गत अहिलेसम्म देशभरका ३९५ जनाभन्दा बढी ग्राहकहरूले बिमाबापत २ करोड ४८ लाख रुपैयाँभन्दा बढी रकम प्राप्त गरिसकेका छन् । यस किसिमका बिमासहितको बचत योजनाहरूबाट आमसर्वसाधारणलाई बचत गर्न थप प्रोत्साहन र प्रेरणा मिलेको बैंकले विश्वास लिएको छ ।

प्रकाशित समय : २३:५१ बजे