नेपाली कांग्रेसले बाढीपहिरोबाट पीडित नागरिकको जीवन रक्षा, उद्धार तथा राहत कार्यलाई प्रभावकारी रूपमा तत्काल अघि बढाउन सरकारसँग आग्रह गरेको छ । कांग्रेसले आज जारी गरेको विज्ञप्तिमा प्राकृतिक विपतको घडीमा पीडित परिवारलाई तत्काल खाद्यान्न, लत्ता कपडा, भाँडाकुडा, औषधि र अस्थायी बसोबासको यथाशीघ्र उचित प्रबन्ध गर्न सरकारसँग आग्रह गरेको हो ।

नेपाली कांग्रेसले बाढीपहिरोबाट विभिन्न जिल्लाहरुमा ‘डेढ दर्जनभन्दा बढी व्यक्तिको मृत्यु भइसकेको तथा ठूलो संख्यामा मानिसहरु वेपत्ता र विस्थापित हुनका सार्थ कयौं व्यक्तिहरु घाइते भएका छन् ।’ कांग्रेसद्वारा जारी विज्ञप्तिमा भनिएको छ, ‘हजारौं हेक्टर खेतीयोग्य जमिन डुवानमा परेको, पहिरो र डु्वानका कारण सडक यातायात अवरुद्ध भएको घटनाप्रति नेपाली कांग्रेस सहानुभूति प्रकट गर्दछ ।’

कांग्रेसले विपतको यो समयमा प्रभावित नागरिकको जीवन रक्षा, उद्धार र राहतको कार्यलाई प्रभावकारी बनाउन सरकारसँग आग्रह गरेको छ । पीडितहरुका लागि खाद्यान्न, लत्ताकपडा, औषधि तथा अस्थायी बसोबासको यथाशीघ्र उचित प्रबन्ध गर्नसमेत सरकारसँग आग्रह गरेको छ ।

विज्ञप्तिमार्फत कांग्रेसले बाढी, पहिरो र डुवानका कारण क्षती भएका सडक, विद्यालय पुलपुलेसा लगायत भौतिक पूर्वाधारहरुको यथाशीघ्र पुनःनिर्माण गर्नसमेत सरकारसँग आग्रह गरेको छ । साथै प्रभावित जिललाका आफ्ना नेता, कार्यकर्ता, भातृ एवं शुभेच्छुक संस्थाका सबै निकायहलाई उद्धार, राहत र उचित बसोबासको व्यवस्था मिलाउने कार्यमा सहयोग पुर्याउन निर्देशन दिएको छ ।

प्रकाशित समय : १८:३९ बजे