३३ किलो सुन तस्करीको छानबिनका लागि गठित समितिले हालसम्म गरिएको कार्यप्रगतिको प्रतिवेदन प्रधानमन्त्री केपी ओलीलाई बुझाएको छ । समितिले ७५२ पृष्ठको सो प्रतिवेदनमा घटना विवरण, तथ्य र सम्भावना र सुझाव सहितका विषय समेटेर चार महिनासम्म गरेको अनुसन्धानलाई समेटेको छ ।

गृह मन्त्रालयका सहसचिव ईश्वरराज पौडेलको संयोजकत्वमा गठित छानबिन समितिले तयार पारेको प्रतिवेदन बुझाएसँगै समितिको समयावधी पनि सकिएको छ । यससँगै जारी छानबिन कार्यबीचमै अलपत्र पर्ने देखिएको छ ।

गत असार दोस्रो हप्ता समिति संयोजक पौडेललाई बालुवाटार बोलाएर प्रधानमन्त्री ओलीले ‘मान्छे मात्रै समाउने ३३ केजी सुन खै’ भन्दै समितिको आलोचना गरेका थिए । त्यस बेला प्रधानमन्त्री ओलीले कार्यप्रगतिको प्रतिवेदन बुझाउन समितिलाई निर्देशन दिएका थिए ।

गत माघमा दुबईबाट नेपाल आएको साढे ३३ किलो सुन त्रिभुवन अन्तर्राष्ट्रिय विमानस्थलबाट हराएको र फागुनमा सनम शाक्यको हत्या भएपछि वि.सं. २०७४ चैत २० गते मन्त्रिपरिषद्को बैठकले छानबिनका लागि समिति गठन गरेको थियो । जेठ ३० गतेसम्म अनुसन्धान सक्नेगरी गठित समितिले अनुसन्धान समयमा नसकेपछि सरकारले असार ३२ गतेसम्म म्याद थपेको थियो ।

यस क्रममा मुख्य अभियुक्त चुडामणि उप्रेती ‘गोरे’, राप्रपाका नेता भुजुङ गुरुङ, राजेन्द्रकुमार शाक्य, छिरिङ वाङदेललगायतलाई पक्राउ गर्न समिति सफल भयो । पूर्वप्रहरी नायव महानिरीक्षक गोविन्दप्रसाद निरौला, प्रहरी वरिष्ठ उपरीक्षक दिवेश लोहनी, श्याम खत्री, प्रहरी उपरीक्षक विकासराज खनाल सहित प्रहरी अधिकारीहरु पनि पक्रिए । सुन तस्करी र सनम हत्यापछि ७५ जनाविरुद्ध अभियोजन मुद्दा दायर भएको छ । अझै ३० जना फरार अभियुक्त पक्राउ पर्न बाँकी छ ।यति धेरै ब्यक्ति पक्राउ परिसक्दा समेत हराएको सुन नभेटिदा आश्चर्य उत्पन्न भएको छ ।

प्रतिवेदनमा समेत उक्त ३३ केजी सुनको अवस्थाका बारेमा केही उल्लेख गरिएको छैन । समितिले प्रतिवेदन बुझाएसँगै ३३ केजी सुनको छानबिन कार्य के हुन्छ भन्ने अन्योलता सृजना भएको छ ।

प्रकाशित समय : १५:०४ बजे