भूकम्पका कारण क्षतिग्रस्त मुलुककै पुरानो भानु माध्यमिक विद्यालय (दरबार हाइस्कुल)को पूनर्निर्माण चीन सरकारको सहयोगमा सुरु गरिएको छ ।

शुक्रबार एक कार्यक्रममा शिक्षा विज्ञान तथा प्रविधि मन्त्री गिरिराज मणि पोखरेल र नेपालका लागि चिनीया राजदुत यु होङले संयुक्त रुपमा शिलान्यास गरी पुनर्निर्माण कार्य सुरु गरेका हुन् । भूकम्पपछि भौतिक संरचना पुनर्निर्माणका लागि २३ जुलाई २०१५ मा चीन सरकार र अर्थ मन्त्रालयबीच २५ ओटा क्षतिग्रस्त संरचनाको पुनर्निर्माण चीनले गर्ने सहमति भएको थियो । सोही अनुरुप दरबार हाइस्कुलको पुर्निर्माण हुन लागको हो ।

विद्यालयको नेपाल सरकार र चीन सरकारले संयुक्त रुपमा डिजाइन गरेको नक्सा काठमाडौं महानगरपालिकाबाट पास भएर आइसकेको छ । चीन सरकार आफैले छानेको २५ आयोजना मध्ये दरबार हाइस्कुल पनि पर्ने भएकोले चीनले करिब ८० करोडको लगानीमा स्कुलको पुननिर्माण गर्न लागेको प्राचार्य हेमचन्द्र महतोले बताए ।

पुनर्निर्माणपछि स्कुल चार तलाको हुनेछ भने ४० भन्दा बढी कोठा हुनेछन् । प्राचार्य महतोका अनुसार २० महिनामा विद्यालयको पुननिर्माण कार्य समाप्त हुनेछ । १ सय ६५ वर्ष पहिले स्थापना भएको यो विद्यालय मुलुककै जेठो विद्यालय हो ।

प्रकाशित समय : २२:०१ बजे