बुधबार प्रधानमन्त्री निवास बालुवाटारमा बसेको नेकपाको सचिवालय बैठकले तल्ला तहको एकतामा देखिएको विवाद मापदण्ड र विधि बनाएर टुंगो लगाइने प्रस्ताव प्रस्तुत भएको छ । नेकपाका अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले संयुक्त रुपमा यस्तो प्रस्ताव गरेको नेकपाका प्रवक्ता नारायणकाजी श्रेष्ठले जानकारी दिए ।

तर, बुधबार छलफल नसकिएको भन्दै बिहीबारका लागि बैठक पुनः डाकिएको छ । तल्ला तहको एकीकरणका क्रममा पूर्व एमालेभित्रै विवाद देखिएको छ । एकताका लागि भएको सिफारिसप्रति नेकपाका नेता माधव नेपाल समूहले असहमति जनाउँदै आएको छ ।

जसका कारण अध्यक्षद्वय ओली र प्रचण्डले मापदण्ड र विधि बनाएर एकता टुंग्याउने प्रस्ताव गरेको बुझिएको छ । बुधबार छलफल नसकिएपछि बिहीबार दिउँसो ३ बजे पुनः सचिवालयको बैठक बस्ने भएको छ ।

मुख्यतः नेकपाभित्र सांगठनिक एकताका सम्बन्धमा तीब्र विवाद देखिएको छ । श्रेष्ठका अनुसार बुधबारको बैठकमा महासचिव विष्णु पौडेलले एकता सम्बन्धमा प्राप्त प्रतिवेदनहरु बैठकमा पेश गरेका छन् ।

प्रकाशित समय : ०१:३२ बजे