नेपाल राष्ट्र बैंकले दसैंलाई लक्षित गरी १३ अर्ब रुपैयाँ बराबरको नयाँ नोट निष्कासन गरेको छ । राष्ट्र बैंकका राष्ट्र ऋण तथा मुद्रा व्यवस्थापन विभागका प्रमुख कार्यकारी निर्देशक लक्ष्मीप्रपन्न निरौलाले दसैंलाई लक्षित गरी १३ अर्ब रुपैयाँको नयाँ नोट निष्काशन गरिएको बताए ।

सर्वसाधारणलाई वितरण गरिने उक्त नयाँ नोट बैंकहरुलाई भने १२ गते शुक्रबारदेखिनै वितरण गरिने राष्ट्रबैंकले जनाएको छ । बैंकलाई १२ गतेदेखिनै नयाँ नोट वितरण गरिने भए पनि सर्वसाधारणले भने नयाँ नोटका लागि २१ गतेसम्म कुर्नुपर्ने भएको छ ।

५, १०, २०, ५० र १०० दरका नोट १३ अर्ब रुपैयाँभन्दा बढी सटही प्रयोजनका लागि निष्काशन गरेको निरौलाले बताए । नेपाल राष्ट्र बैंक थापाथली, राष्ट्रिय बाणिज्य बैंक, कृषि विकास बैंक र नेपाल बैंकका काठमाडौंका विभिन्न ठाउँका लगभग १६ शाखा मार्फत नयाँ नोट सर्वसाधारणले पाउनेछन् ।

काठमाडौं बाहिरबाट पनि सरकारी नोटकोष भएको बैंकबाट नयाँ नोट वित्तरण गरिने निरौलाले जानकारी दिए । प्रतिव्यक्ति २७ हजार रुपैयाँसम्म नयाँ नोट वितरण गर्ने राष्ट्र बैंकको तयारी छ । गत वर्ष १२ अर्ब रुपैयाँ जति निष्काशन गरेकोमा यसवर्ष १३ अर्ब रुपैयाँ भन्दा बढी रहने उनले बताए ।

प्रकाशित समय : ००:१५ बजे