देशभर विभिन्न महिला तथा बालिकाहरु हत्या र बलत्कारका घटनाहरु सार्वजनिक भईरहँदा पोखरामा शुक्रबार रहस्यमय घटना घटेको छ । विद्यालयबाट घर फर्केकी एक छात्राको एक दिनपछि शव भेटिएको घटनाले उनको मुत्यूको घटना रहस्यमय बनेको हो ।

पोखराको बाटुलेचौरस्थित विन्ध्यवासिनी मावि कक्षा ६ मा अध्ययनरत पोखरा लामाचौर निवासि १३ वर्षीया बालिका पुष्पा केसीको शव भेटिएको प्रहरीले जनाएको छ । शुक्रबार पोखरा महानगरपालिका–१९ लामाचौरको फापरतरोको झाँडीमा शव फेला परेको कास्कीका प्रहरी प्रवक्ता डिएसपी रवीन्द्रमान गुरुङले बताए । घटनाको सुस्म ढंगले अध्ययन गर्न लागेको उनले बताए ।

बिहीबार विद्यालयको बसबाट घर फर्किन लागेकी केसीको एक दिनपछि शव भेटिएको हो । उनले लगाएको टाइ र सर्ट शवसँगै र स्कर्ट भने केही पर भेटिएको स्थानीयले बताएका छन् । उनको बलत्कार पछि हत्या भएको हुन सक्ने स्थानियको आशंका छ ।

स्थानीयले बालिकाको शव देखेपछि प्रहरीलाई खबर गरेका थिए । बालिकाको शवलाई पोस्टमार्टम गर्न स्वास्थ्य विज्ञान प्रतिष्ठान (पश्मिाञ्चल क्षेत्रीय अस्पताल) पोखरामा राखिएको छ । बालिकाको हत्या भएको हो कि होइन शव पोस्टमार्टमपछि मात्र थाहा हुने डिएसपी गुरुङले बताए ।

बिहीबार विद्यालयबाट फर्किए देखी नै हराएकी उनका आफन्त साथीको घरमा भएको आशंकामा एक दिन पछि शुक्रबार मात्र उनको खोजी कार्यमा जुटेका थिए । घरभन्दा करिब साढे दुई किलोमिटर टाढा झारले छोपेको अवस्थामा उनको शव भेटिएको थियो भने जामा र विद्यालयको बेल्ट फुत्केको अवस्थामा भेटिएको जनाइएको छ ।

तरकारी किन्नु छ भन्दै विद्यालयको बसबाट घर नजिक झरेको विद्यालयले जनाएको छ । घर आउने ठाँउमा उनकी बहिनी झरेको तर पुष्पा भने नझरेको बताइन्छ । विद्यालयका प्रधानाध्यापक कृष्णप्रसाद आचार्यले उक्त घटनाप्रति गम्भिर ध्यानाकर्षण भएको जनाउदै घटनाको सत्य, तथ्य यथाशीघ्र छानबिन गरी वास्तविकता पत्ता लगाई दोषी उपर कडा कारवाहीको माग गरेका छन् । विद्यालयले एक असल, ईमान्दार र अनुशासित विद्यार्थी गुमाउनु परेको बिद्यालयले जारी गरेको विज्ञप्तीमा उल्लेख छ ।