विभागीय टोली नेपाल पुलिस क्लबले अर्को विभागीय टोली सशस्त्र प्रहरी बलको एपिएफलाई पराजित गर्दै दोश्रो स्थानमा रहेको छ । बिहीबार भएको खेलमा पुलिसले एपिएफलाई २५-१७, २५-११, २४-२६, २५-१७ को सेटमा पराजित गर्दै थप ३ अंक सहित पुलिस १४ अंकका साथ दोश्रो स्थानमा रहेको हो ।

डिफेण्डिङ च्याम्पियन त्रिभुवन आर्मी क्लब भने १५ अंकका साथ शीर्ष स्थानमा छ । एपिएफ १३ अंकका साथ तेश्रो स्थानमा छ । त्यस्तै नयाँबजार युवा क्लब ९ अंक, मणिमुकुन्द भलिबल क्लबको ८ अंक छ भने जाउलाखेल भलिबल ट्रेनिङ क्लब र ढोरपाटन स्पोटर्स क्लबले समान ३-३ अंक जोडेका छन् ।

हेल्थ नेपाल स्पोटर्स क्लब प्रतियोगिताबाट बाहिरिएको छ । ७ अंक ल्याउदै अघि बढेको क्लबले विदेशी खेलाडी सहभागी गराए पनि आवश्यक काजपत्र पेश गर्न नसके पछि प्रतियोगिताबाट बाहिरिएको बताइन्छ ।

बिहीबार भएको खेलमा ढोरपाटनले जाउलाखेललाई २५-१७, १८-२५, २५-१५ र २५-१८ को सेटमा पराजित गर्दै ३ अंक जोड्न सफल भएको हो । नयाँबजार युवा क्लबले ढोरपाटनलाई २५-२२, २५-१८, २५-१८ को सोझो सेटमा पराजित गर्यो । बिहीबारको अन्तिम खेलमा मणिमुकुन्द भलिबल क्लबले जाउला खेललाइ २५-१४, २५-१२, २५-२० को सोझो सेटमा पराजित गर्यो ।

पुष ७ गतेसम्म चल्ने प्रतियोगितामा विजेताले दुई लाख पुरस्कार पाउने छन् । राष्ट्रिय बाणिज्य बैंकको मुख्य प्रायोजनमा पोखरामा भएको प्रतियोगितामा ८ टिमको सहभागिता रहेको राष्ट्रिय रेफ्रि गोपाल थापाले बताए ।