विराटनगर महानगरपालिकाले ५० तल्ले भ्यु टावर निर्माण गर्ने भएको छ । सत्यनारायण मन्दिर व्यवस्थापन समितिले ९९ वर्षको लिजमा भ्यु टावर निर्माणका लागि दुई बिघा ८ कठ्ठा जमिन उपलब्ध गराएसँगै भ्यु टावर बन्ने पक्का भएको हो ।

व्यवस्थापन समितिका अध्यक्ष बल्लभ अधिकारी, संरक्षक सल्लाहकार एवं पूर्वसचिव किशोर थापाले महानगर प्रमुख भीम पराजुली र उपप्रमुख इन्दिरा कार्कीलाई एक समारोहबीच जग्गा हस्तान्तरण गरेका छन् । विराटनगर–३ स्थित औषधि व्यवस्था कार्यालयनजिक धरान रोडसँग जोडिएको सो जग्गा आयल निगम कार्यालयनजिकै पर्छ ।

नगर प्रमुख पराजुलीले भ्यु टावर निर्माणको डीपीआर सुरू गरेर भवनको डिजाइन चाँडै गरिने बताए । ५० तल्ले भ्यु टावरभित्रै रेस्टुरेन्ट र वरपर रमणीय पार्क बन्नेछ ।

भ्यु टावरकै जग्गामा औद्योगिक प्रदर्शनी स्थलसमेत निर्माण गरिनेछ । विराटनगर औद्योगिक राजधानी भएर पनि एउटा पनि औद्योगिक प्रदर्शनी स्थल छैन । टावर निर्माणका लागि संघीय सरकारले ५० करोड रूपैयाँ सहयोग उपलब्ध गराउने बचन यसअघि नै दिएको प्रमुख पराजुलीले जानकारी दिए । पर्यटकीय पूर्वाधारको अभाव खड्किरहेको महानगरमा भ्यु टावर निर्माणलाई महत्वका साथ हेरिएको छ ।