चाडपर्व नजिकिँदै गर्दा सुदूरपश्चिम प्रदेशकै रेफरल अस्पतालको रुपमा रहेको सेती अञ्चल अस्पतालको आकस्मिक कक्षमा चिकित्सक र स्वास्थ्यकर्मीहरुको मनोमानी बढेको छ ।

डाक्टरसहित अन्य स्वास्थ्यकर्मी पनि इमर्जेन्सी वार्डमा ड्युटीको समयमा अन्यत्र व्यस्त हुन थालेपछि बिरामी मर्कामा परेका छन् । इमर्जेन्सी वार्डको ड्युटी छोडेर चिकित्सक र अन्य स्वास्थ्यकर्मीहरु बेपत्ता हुने गरेको गुनासो बिरामी र उनीहरुका आफन्तले गर्दै आएका छन् ।

आइतबार साँझ सर्पले टोकेकी बालिका रुपा विकको उपचारका लागि अस्पताल पुगेका धनगढी उर्मीका कमल ढाटले इमर्जेन्सी वार्डमा एक जना मात्रै स्वास्थ्यकर्मी भेटिएको र विरामीलाई हेर्न पनि नमानेको गुनासो गरे । दिउँसो २ बजेदेखि राति ८ बजेसम्म अहेवद्धय राधाकृष्ण चौधरी र ओम प्रकाश बोहरा तथा डाक्टर गोविन्द रावतको ड्युटी थियो ।

आकस्मिक वार्डका चिकित्सक र स्वास्थ्यकर्मीहरु विगतमा रातभर सुत्न थालेपछि बिरामी र कुरुवा मर्कामा परेको गुनासो आउने क्रमकाबीच नै अहिले दिनमा समेत आकस्मिक कक्षमा डाक्टर र स्वास्थ्यकर्मी भेट्न मुस्किल हुन थालेको हो ।

आकस्मिक कक्षका इन्चार्ज कृष्ण बोहराले पनि वार्डमा कर्मचारी नबस्ने समस्या रहेको स्वीकार गरे । सेती अञ्चल अस्पतालका मेडिकल सुपरिटेन्ड डाक्टर हेमराज पाण्डेले भने सो बारेमा जानकारी नभएको प्र्रतिक्रिया दिएका छन् । उनले समस्या देखिएको भए वार्ड इन्चार्जसँग छलफल गरेर समस्या समाधान गर्ने बताए ।

दसैं लागेसँगै अस्पतालमा कार्यरत चिकित्सक र स्वास्थ्यकर्मी पनि बिदामा बस्न सुरु गरिसकेका छन् ।