भारतविरोधी प्रचार गरेको भन्दै नेपाल–भारत सीमाक्षेत्रमा रहेका नेपाली रेडियोको प्रशारणमा रोक लगाइएको छ । सीमाक्षेत्रमा भारतविरुद्ध प्रचारवाजी गरेको र सुरक्षा खतराका बारेमा समाचार प्रशारण गरेको भन्दै भारतले नै सीमामा रहेका रेडियो स्टेशनको प्रशारणमा बन्देज लगाएको हो ।

लाइभ हिन्दुस्तान डटकम नामक भारतीय अखबारका अनुसार सीमा क्षेत्रमा रहेका माइती नेपाल, नेपालीको रेडियो, रेडियो हिमालय, रेडियो नेपाल, रेडियो कान्तिपुर, रेडियो अमरापुर र रेडियो तरंगलगायतमाथि रोक लगाइएको छ ।

सीमा क्षेत्रमा प्रशारण हुने रेडियोको फ्रिक्वेन्सी भारतीय सीमामा रहेका गाउँ र बिहार लगायतका क्षेत्रसम्म पनि सुनिने भएकाले केबल अपरेटरलाई नै रेडियो प्रशारण बन्द गर्न एडिजी कानुन व्यवस्थापक अशोक कुमारले निर्देशन दिएको अखबारले उल्लेख गरेको छ ।

चंदनचौकी, गौरिफंटा, तिकुनिया क्षेत्र लगायत १७ स्थानमा प्रशारण रोक लगाइएको छ । यस्तै, नेपाली स्टेशनमा समेत ‘कूप्रचार’ नगर्न भन्दै सजग गराइएको समेत अखबारमा उल्लेख गरिएको छ ।

गुप्चर संस्थाको हवाला दिँदै सो अनलाईनले सीमा क्षेत्रमा माओवादीसमेत देशविरोधी गतिविधिमा संलग्न हुन सक्ने आशंका गरेको छ ।

केही च्यानलले नेपाली गीतका साथै भारतसँगको सीमा विवाद, भारतीय सुरक्षा बलको ज्यादती, नेपालमा माओवादीहरुले चलाएको जनयुद्धबारे बहस आयोजना गरिरहेका खबरमा उल्लेख छ । एपपी रामलाल वर्माले भारत–नेपाल सीमाको जिल्ला भएकाले आफूहरुले सजगता अपनाएको बताएका छन् ।

भारतको उत्तर प्रदेशको महाराजगञ्ज जिल्लाको ८६ किलोमिटरसम्म नेपालको सीमा छ । तहसीलो नौतनवा र निचलौलमा नेपाली मूलका मानिसहरुको संख्या बाक्लो छ । भारतीय सेनाबाट रिटायर भएपछि अधिकांश नेपाली यही बसेका छन् । यी सबै नेपाली रेडियोका श्रोता हुन् ।