क्रिस्चियन धर्म प्रचारका लागि काठमाडौँमा हुन लागेको एक कार्यक्रममा सरकार नै आयोजक भएपछि विपक्षी नेपाली कांग्रेसले आपत्ति जनाएको छ । ‘द एसिया प्यासिफिक समिट २०१८’ को कार्यक्रममा नेपल सरकार सहआयोजक बनेपछि कांग्रेसले विरोध गरेको हो ।

राजधानीमा शनिबार दिउँसो पत्रकार सम्मेलन नै गरेर कांग्रेस प्रवक्ता विश्वप्रकाश शर्माले सरकारको विरोध गरे । प्रवक्ता शर्माले सरकारले आईएनजीओको कार्यक्रममा सहआयोजक बनेको विश्वमै नभएको बताए । ‘विश्वमा कुनै पनि सरकार आईएनजीओको कार्यक्रममा सहआयोजक बन्दैन, त्यो कानुनविपरीत पनि धर्म प्रचार गर्ने कार्यक्रममा सरकार आयोजक बनेको छ,’ उनले भने ।

कार्यक्रम धर्म प्रचारका लागि समेत आयोजना हुन लागेको सुनिएको उल्लेख गर्दै उनले यो विषय संविधानको बर्खिलापमा रहेको बताए । युनिभर्सल पिस फेडरेसन (यूपीएफ) को नेपाल शाखाले मंसिर १४ देखि १७ गतेसम्म होटल ह्यातमा सम्मेलन गर्न लागेको छ ।

युनिभर्सल पिस फेडरेसन (यूपीएफ) क्रिस्चियन धर्म विस्तारका लागि स्थापना भएको संस्था हो । सो संस्थाको नेपाल शाखाले आयोजना गर्न लागेको सम्मेलनमा नेपाल सरकार नै सहआयोजक रहेको भन्दै यसअघि नै आलोचना हुँदै आएको थियो । नेपाल सरकार सहआयोजक रहेको सो सम्मेलनमा नेकपाका अध्यक्ष एवं प्रधानमन्त्री केपी शर्मा ओलीलाई प्रमुख अतिथि बनाउने आयोजकको तयारी छ ।