पोखरा २२ को पुम्दीकोटमा हाल निर्माणाधीन अवस्थामा रहेको विशाल महादेवको मूर्तिसहितको भौतिक संरचना निर्माणका लागि स्पेनबाट समेत आर्थिक सहयोग प्राप्त भएको छ ।

कास्की समाज स्पेनले एक समारोहका बीच मंगलबार पोखरामा विशाल महादेव मूर्ति निर्माण समितिलाई एक लाख रुपैयाँ आर्थिक सहयोग हस्तान्तरण गरेको हो ।

समितिका अध्यक्ष चन्द्रकान्त बरालसहितको टोलीलाई गैर आवासीय नेपाली संघका सल्लाहकार पुष्पराज तिमिल्सिना, कास्की आदर्श अन्तर्राष्ट्रिय समन्वय परिषद कास्कीका अध्यक्ष शोभाखर भण्डारी, कार्यक्रम संयोजक गोविन्द तिमिल्सिनालगायतले उक्त रकम हस्तान्तरण गरेका हुन् ।

एनआरएनका सल्लाहकार तिमिल्सिनाले ९० प्रतिशत नेपालीहरु विदेशमा काम सिक्न र सुध्रिने गरेको बताए । नेपालको भन्दा राम्रो जीवन बिताउने उद्देश्यले विदेशिएको भनिएका नेपाली विदेशमा रहेर पनि नेपाल र नेपालीका चिन्ता गरिरहेको बताए ।

समितिका अध्यक्ष बरालले ४० करोडको विशाल महादेवको मूर्ति सहितको भौतिक संरचना गर्ने अभियानमा स्पेनबाट सहयोग प्राप्त भएकोमा खुसी व्यक्त गर्दै कास्की समाज स्पेनलाई धन्यवाद दिएका छन् । करिब एक चौथाई काम सकिएको बताएका उनले अबको ३ वर्षमा धेरै योजना सम्पन्न गर्ने जनाए ।

परिषदका उपाध्यक्ष निरज थापाले कास्की समाज विश्वका १८ मुलुकसम्म संस्थागत ढंगले अघि बढेको जनाए । परिषदका सचिव अमृत आचार्यले आफूहरुले स्पेनमा हरेक वर्षजसो सामाजिक कार्य गर्दै आउने क्रममा आफूहरुले गरेको आम्दानीको केही रकम सामाजिक संघ संस्थामा सहयोग गर्दै आएको बताए ।

परिषदका सदस्य शिवकुमार लामिछानेले आफूहरु कर्मले बिदेसिनुपरे पनि आफूहरुको मन भने नेपालमै हुने बताए । पुम्दीकोटबाट माछापुच्छ्रे, अन्नपूर्ण सहितका हिमश्रृखला, विश्व शान्ति स्तुपाः, पोखरा, फेवाताल, सराङकोट, काहुँडाँडा, रानीबनलगायतको दृश्य देखिन्छ ।

प्रकाशित समय : १३:५३ बजे