झापा । शिवसताक्षीस्थित दूधे रङ्गशालामा हुने दोस्रो संस्करणको झापा महिला गोल्डकपलाई दृष्टिगत गरी दुई हजार दर्शक क्षमताको आधुनिक अस्थायी प्यारापिट जडान गरिएको छ ।

मैदानको पूर्वतर्फ जडान गरिएको सो प्यारापिट दुई हजार दर्शक क्षमताको रहेको गोल्डकपका अध्यक्ष सन्तोष थोप्राले जानकारी दिए ।

आगामी मङ्सिर ५ गतेदेखि सुरु हुने प्रतियोगितालाई लक्षित गरी निर्माण गरिएको प्यारापिट ग्याल्भनाइज्ड स्टिलका पाइप, रिङलक प्रणाली र प्लेटफर्म प्रयोग गरी तयार पारिएको उनले बताए।

प्रतियोगिता सम्पन्न भएपछि फुकालेर अन्यत्र लैजान सकिने भएकाले यस्तो संरचना ठूला खेलकुद प्रतियोगिता, सांस्कृतिक कार्यक्रम तथा कन्सर्टका लागि उपयोगी हुनेछ ।

प्यारापिटको इन्जिनियरिङ डिजाइन, भार परीक्षण, रेलिङ, भ-याङ, आपत्कालीन निकास तथा सुरक्षा प्रमाणीकरणको व्यवस्था गरिएको छ ।

दूधे रङ्गशालाको पश्चिमतर्फ स्थायी प्यारापिट छ भने पूर्वतर्फ रिङलक प्रविधिको अस्थायी प्यारापिट निर्माण गरिएको छ । उत्तर र दक्षिणतर्फ बाँसका अस्थायी प्यारापिट निर्माण गर्ने तयारी छ । प्रतियोगिताका लागि रङ्गशालाको दर्शक क्षमता विस्तारसँगै दर्शक व्यवस्थापनलाई पनि प्राथमिकतामा राखिएको आयोजकले जनाएको छ ।

प्रतियोगिताको विजेतालाई ११ लाख पुरस्कार प्रदान गरिने छ भने उपविजेताले पाँच लाख ५० हजार प्राप्त गर्ने छ । प्रतियोगितामा नेपाल, भारत, भुटानसहित आठ टिम सहभागी हुनेछ । प्रतियोगिताको फाइनल खेल आगामी मङ्सिर १२ गते हुने सचिवालय प्रमुख हिमाल खरेलले बताए।